Hmasawnna hnathawh hrang hrangte thlirho

Champhai District Development Co-ordi­nation & Monitoring Committee (DDCMC/DISHA) chu, Ningani khan DC conference hall-ah Rajya Sabha MP Ronald Sapa Tlau hoin an ṭhukhawm a, sorkar laipui scheme hnuaia hnathawh hrang hrang an thliro.

Rajya Sabha MP chuan Champhai dis­trict chhunga sorkar hnathawkte chu district tan enge ka tihve theih tih rilru pu chunga taima leh rinawm taka thawk turin a chah a, "Mumal leh chak zawka hnathawh anih theih nan MLA-te nena inrawn tawn a pawimawh," a ti a, run dal mai ni loa district dinchhuahna atana theihtawp chhuaha hna thawk turin a chah.

Meeting-a tarlan a nih danin, Champhai district-ah hian MGNREGA hnuaiah 2017-18 Feb­ruary thla thlengin ni 47 inhlawhna siam tawh niin, job card 28,322 a awm mek a ni. PMAY-G (Rural Housing Scheme) hnuaiah beneficiary mi 150 te hnenah insak ṭan­puina pek niin, IWMP pro­ject paruk kalpui mek a ni.

Swachh Bharat Mission (Urban) hnuaiah hnawm bawm sem, fai inzirtirna campaign leh ODF re-certification Champhai, Khawzawl, Khawhai leh Biate-ah te neih niin ODF-a recertified an ni.

Swachh Bharat Mi­ssion (Rural) hmalaknain thingtlang khaw 10-ah Solid Waste Management (SWM) hmun siam ni tawhin, Community Sanitary Complex (CSC) pawh 3 siam zawh a ni tawh. Khuangthing WSS leh Bungzung WSS-te zawh ni tawhin heng bakah hian Water Supply Scheme (WSS) dangte pawh thawh chhunzawm zel a ni a, Keilungliah Recreation Dam pawh thawh thuai tura hmalak mek a ni.

NHM hnuaiah Octo­ber-December, 2017 chhung khan naupiang dam ṭha 408 awmin IMR chu 14.71 a ni a, nu nau chunga thi pakhat a awm. A nawlpuia thisen test mi 814 zinga 26-te chu HIV positive an ni a, nu naupai thisen test mi 589 zinga 4-te pawh HIV positive an ni tih hmuhchhuah a ni.

National Social Assistance Programme (NSAP) hnuaiah tar chawmna/ tar pension mi 2,782, hmeithai pension mi 269 leh disabled pension/ eualbanlo mi 75-te hnenah pek mek a ni.

Meeting-ah hian Cham­phai district-a MLA pali - JH Roṭhuama, Lalrinliana Sailo, TT Zothansanga leh T Sang­kunga te pawh an tel a ni.