ZPM working president K Sapdanga : CM atan ZPM-in Lalduhoma an hual

Zoram Peoples' Movement (ZPM) working president atan K Sapdanga ruat a ni a, nimin khan ZPM Val Upa Council (VUC) chairman Lalfakzuala, IAS (Rtd) chuan ZPM pisa-ah a puang. Hetih lai hian, ZPM-in kum 2023 inthlanpuiah sorkarna an siam chuan chief minister tur chu ZPM leader Lalduhoma a nih thu tarlan a ni.

ZPM president Lalliansawta chuan, an party-in post an neih ngai loh neia puan a ni chu lawmawm a tih thu sawiin, "VUC-in working president atana Pu K Sapdanga an ruat hi a inhmeh hle a, a lawmawm ka ti. Dam lohna avanga ka theih loh chhung zawnga party a hruai dan enin a àwm ka ti. Hmasawnna thar kan nei zelin ka hria. ZPM hi mipui khawngaihna azarah kan ṭhang chho hle," a ti.

Working president an neih chhan ama rawt a nih thu sawiin ZPM President chuan, "Ka dinhmun thlirin OB-in àwm min tihpui a, Executive chu kan tam tham deuh a, hripui avangin ṭhutkhawm theih a nih loh avangin PAC pun mai ang tih a ni. PAC chuan remtiin, working president ruat erawh VUC kutah an dah," a ti a; an ruahmanna tluang taka a kal chu lawmawm a tih thu a sawi.

Lalliansawta chuan, ZPM-ah president, vice president, leader leh VUC an awm avangin 'Sorkar mah se, kal ngaihna a awm lo' tia sawi an awm ṭhin thu sawiin, "Nihna chelhtute hi kan buai lo. VUC chu dan hnuaia awm lo a nih avangin a hman tlak lo ang tihte a awm a, a hmang turte'n an thu kan zâwm tlat a, kan buai chuang lo. Sorkar hma aṭangin kan chhawr mawlh mawlh a ni," a ti.

ZPM President chuan, leader atana Lalduhoma an ruat chu a àwm hliah hliah tih sawiin, "A nihna kan vuah fuh hle. A thawh tur siam ngaiah kan ngai lo a, leader enin kan en mai. Pathian leh mipui zarah sorkarna kan siam chuan Chief Minister tur chu amah a ni mai," a ti a; Lalduhoma chu zalen takin Zoram hmun tinah campaign-in a kal mai tur thu a sawi.

ZPM leader Lalduhoma, MLA chuan, an President hnenah a hriselna dinhmunin a zir loh avang leh inthlanpui a hnaih avangin working president neih a rawt thu sawiin, "VUC Chairman pawh ka ráwn a ni. Pu K Sapdanga hi kan President theih loh laia hneh taka min uaptu a ni, kawng hrang hrangin kan chhawr em em a ni. Inthlanpui hmachhawn tur kan nih avangin kan organisation a chak a ngai," a ti.

Boruakin an lam a hawi nia a hriat thu sawiin ZPM Leader chuan, "Páwn lam aṭangin party dangin kan boruak hi an tichhe theiin ka ring tawh lo. Party chhungah inlungrualna a awm loh chauhin kan buai ang," a ti a; party paruk inzawmkhawm chu a tirah chuan neuh neuh awm mah se, Pathian hruaina avangin neuh neuh awmte chu an paltlang tawh tih a sawi.

ZPM working president atana ruat thar K Sapdanga chuan, an President leh Leader-in working president neih an rawt thu sawiin, "President, VUC leh PAC-te an zahawm a, hnial ngam a ni lo. Mahnia thawh tur a ni lo a, a huhoin rem kan ruat a, a huhoin kan thawk leh mai ṭhin. A hming a ropui viau a ni mai thei, team zinga position pakhat a ni mai. Kan inpeizâwn ang a, kan mualpho bik lo ang tih ka beisei," a ti.

An party inkaihhruai danah party dang an entawn lo tih sawiin K Sapdanga chuan, "VUC ang hi Congress party pawhin neih ve an duh a, Ethics Committee an siam a, an ring ngam leh tak tak lo a, an pàmṭùl a ni," a ti a; MNF party pawhin VUC anga party uap mawitu awtin Core Committee din mah se, an party hruaitu lian ho tho Core Committee hruaitu an ni a, anmahni leh anmahni an inuap thu a sawi.

ZPM Working President chuan, an hotu ṭangkai Andrew H Thangliana, Tuirial bialtu MLA-in chatuan ram a pan avangin an mittui pawh a la hul lo tih sawiin, "ICU lama kan luh hlàn khan campaign kick-off programme ni àwm tak an lo hmang tawh. Kan hotupa sûlhnu chhunzawm thei turin mittui nen hna bul ṭan a ngai dawn a nih hmel. Bial mipui khawngaihna leh lainatna kan hmachhuan ve leh ngawt mai dawn a ni," a ti.