Sample endikna hmun tlawh

Health & Family Welfare minister Dr R Lalthangliana leh Infor­mation & Public Relations minister Lalruatkima te chuan nimin khan Aizawla Covid-19 swab sample endikna (Kiosk) - Vanapa Hall, Dinthar leh Electric Vengte an tlawh.

HFW Minister chuan, Vanapa Hall-a Mega Kiosk enkawltu leh thawktute inpekna fakawm a tih thu te, thawktute lo buaipui ṭhintu Tuikual South LTF chungah a lawm thu te, sample booth pathum an hlan (donate) chu fakawm a tih thute a sawi.

IPR Minister chuan, Covid-19 léng chu mipui ṭanrualna azarah hneh a nih ngei a rin thu sawiin, "Mipui thuawihna te, thingtlang aṭanga Aizawl mipui ei tur thlai thar hrang hrang thawn a ni rengte hi a lawmawm a, thingtlang loneitute inpekna a fakawm hle a ni," a ti.

Vanapa Hall Mega Kiosk-ah hian Fluorescent Immunoassays (FIA) dah a ni a, vawi khat endik man Rs. 300 a ni. Chawhrualin, ni tin swab sample 70 lâk a ni ṭhin a, real mode-in darkar khat chhungin sample 60 leh standard mode-in vawi khatah sample 15 endik theih a ni.

Mizorama vantlang kiosk hmasa ber Dinthar Kiosk-ah ni tin mi 50-100 inkarte sample lak a ni ṭhin a; Electric Veng Kiosk chu community kiosk (mahni intuamhlâwm leh intum) awmchhun niin, ni tin sample 50 vel lâk ṭhin a ni.