Assam police-in iron rod an dah lêt

Bairabi Zophaia Bairabi luia lei dawh mekna hmanrua, iron rod eng emaw zat Assam police-te'n August 20, 2021-a an laksakte chu August 22, Pathianni tlai dar 5:30 vel khan lei dawhna hmunah an dah lêt. Hei vang hian MZP sub-headquarters, Bairabi pawhin FIR an thehluh tawh chu an hnûkkîr.

Tarlan tawh angin, Bairabi Zophai huam chhunga Ch. Chhunga leilet bula Mizo IR outpost panna tur lei (bridge) RCC hmanga siam mek chu August 20 chhun dar 12 vel khan Assam police 10 velin tlawhin, hna thawktute chu lei dawh chhunzawm lo turin an hriattir a; lei dawhna hmanrua iron rod an phuar tawh quintal 5 vel chu ṭhiatin an chhuhsak a, Assam lamah an hawpui a ni. Hei vang hian Bairabi MZP chuan August 21, 2021 khan Bairabi Police Station-ah FIR an thehlut a ni.

Lei dawh chhunzawm lo turin Assam police-te'n hriattir mah se, lei dawhtute chuan August 21, Inrinni khan Mizoram police venna hnuaiah lei an dawh chhunzawm a, harsatna awm loin hna an thawk.

Assam police-te'n iron rod an lak chungchangah hian Kolasib DC Dr H Lalthlangliana chu Hailakandi DC nen an indawr a ni. Kolasib DC-in lehkha a thawnah, Assam police-te'n lei dawhna tur iron rod an lak chu dah kîrtir tura a phût bakah, Zophaiah Assam police-te kaltir tawh lo turin Hailakandi DC a phût. Hailakandi DC pawhin Kolasib DC duh dan chu tihhlawhtlin a intiam a, iron rod pawh dah lêttir a tum thu a sawi.

District pahnih DC-te indawrnaa an sawi angin Assam police-te chuan iron rod an lakte chu Pathianni tlai dar 5:30 vel khan Bairabi luia lei dawhnaah an dah let a; chuvang chuan Bairabi MZP pawhin FIR an thehluh tawh chu Pathianni zan dar 6:20 khan an hnûkkîr ve nghal a ni.

Bairabi MZP chuan, Bairabi luia lei dawh mek chu chak zawka thawk turin Mizoram sorkar an ngen a, "Lei dawhna hmunah hian harsatna dang awm palh thei a nih avangin, lei dawh zawh a nih hma chu Mizoram police-te awmtir reng turin sorkar kan phût a ni," an ti.