Assam nen inbe turin Vairengtein CM ngen

Vairengte khawtlang hruaitute chuan nimin khan chief minister Zoramthanga a pisaah an kâwm a, Mizoram sorkar leh Assam sorkar inbe tura ngenna an thlen.

Chief Minister nen an inbiak zawha thuthar thehdarhtute zawhna chhangin Vairengte Joint VC chairman R Lalfamkima chuan, July 26, 2021-ah Mizoram police leh Assam police-te an inkah thu sawiin, "Nunphung pangngaia nung leh turin inbiak a hun tawh kan ti a ni," a ti a; CM-in a chhàn dan erawh sawi a rem rih loa a ngaih thu a sawi.

R Lalfamkima sawi danin, ramri buaiah Mizoram sorkarin kawng hrang hrangin hmalakna eng emaw zat a nei tawh a, mamawh erawh tam tak an la nei. An mamawhte chu Chief Minister hnenah an thlen nghal.

CM Zoramthanga chuan Vairengte khawtlang hruaitute hnenah, Vairengteah IR police company khat a ngheta dah a nih dawn thu a lo hrilh a; IR-te awmna hmun tur pawh tihfel vek a ni tawh.

Vairengte khawtlang hruaitute chuan, ramri buaia Mizoram sorkar hmalakna fakawm an ti a, ramria hmasawnna hna thawh a nih avang leh ramria anmahni veng him tura police ṭhahnem tak dah an nih avangtea lawmthu sawina atan Chief Minister chu tawlhlohpuan, khiangkawi ipte leh khumbeu an hlan a ni.