Oil palm tharthawh lo turin ngen

Conservation Mizoram chuan thuchhuah siamin, Mizoramah oil palm chìn tharthawh lo turin Mizoram sorkar an ngen a, "Kan ram biodiversity tichhe thei sumchang thlai chìnna tura hmalakna kalpui lo turin kan ngen tak meuh a ni," an ti.

Mizoram chu biodiversity-ah a hausa tih sawiin Conservation Mizoram chuan, "Khawvela biodiversity hotspot hausa tak chhunga awm kan nih angin kan ram hlutna hi ṭhangthar awm zel tur tana chhenfâkawm tur khawpa hnutchhiah hi kan tihmâkmawh a ni," an ti a; Mizoram biodiversity hlutna tihniam thei thilte chu do tlat turin Mizoram mipui an sáwm.

Conservation Mizoram chuan, prime minister Narendra Modi-a'n August 8, 2021-ah a Twitter-a a tarlan danin, sorkar laipuiin oil palm chìnna tharthawh leh tura hmalaknaah hmarchhak state-te a tinzâwn hle tih a lang tih an sawi a, "August 19, 2021-a kan chief minister Pu Zoramthanga’n Twitter hmang veka hemi chungchanga lawmthu sawina a siam hi pawi kan tiin, kan ram biodiversity tichhe thei sumchang thlai chìnna tura hmalakna hi kalpui lo turin kan ngen tak meuh a ni," an ti.

Oil palm chìnna atan ramngaw zau tak ṭhiah a ni ṭhin te, oil palm-in khuarèl sik leh sá a tihdanglam nasat dante en chung leh mithiamte thuziak tam tak aṭangin oil palm-in khuarel a tihkhawloh nasatzia hre rengin, oil palm chìn lam tharthawh leh tura hmalakna chu an duh loh thu Conservation Mizoram chuan an tarlang.

"Kan neih chhun Zoram nuam hi kan thlah lo la awm zel turte tana chènna tlak a nih zel theih nan oil palm chìnna tharthawh leh tur hi NGO hrang hrang leh mipuite'n kan hnâwl ngam kan beisei tak zet a ni," tiin, Mizoram tichhe thei hmalakna chu a tàwp thlenga hnualsuat ngam turin an ngen a ni.