DC-in NH-6 kawngpui laitute a kâwm

Khawzawl bawrhsap CC Lalchhuangkima chuan Khawzawl district-a NH-6 kawngpui laih hna thawktu NHIDCL contractor-te chu an hna thawh tawh chin leh harsatna an neihte nimin khan a sawipui.

Inkawmnaah hian contractor-te chu an hnuaia hna thawktu Inner Line Permit (ILP) mamawhte chu a rang lama dilsak vek tura hriattir an ni a; contractor-te chuan an hnathawh mekah harsatna lian tham an tawh rih loh thu an sawi.

Khawzawl district chhunga NH-6 kawng laih hna hi hlawm (package) pali-ah ṭhen a ni a, contractor paliin an thawk. Dulte-Champhai (package-I) km. 17.950-a thui chu Dhariwal Buildtech-in kumin June thla tàwp aṭangin a lai ṭan a, December 24, 2022-ah zawh hman tura ruahman niin, hna 5.17% an zo tawh.

Package-II km. 12.450-a thui chu Dwarkamai Construction-in an thawk a; Package-III km. 26.780-a thui chu Shri Balaji Construction-in June 25, 2021 aṭang thawk ṭanin, hna 1.84 % an zo tawh. Package-IV Seling-Dulte km. 17.160-a thui chu Anusha Projects-in an thawk a, hna 41.69% an zo tawh a ni.

Contract agreement-a inziak aia hunbi hma zelah hnathawh a kal mek niin sorkar thuchhuah chuan a tarlang.