Minister Robert-a'n central hotute a kâwm

Minister of state Robert Romawia Royte chuan nimin khan Delhi-ah Union Sports secretary Ravi Mittal kâwmin, Mizorama infiam­na hmunhma tihhmasawnna tur project-te a sawipui a; sorkar laipuia secretary dangte a kâwm bawk.

Robert Romawia Royte hian Sports secretary Ravi Mittal chu Armed Venga field chhâwng siam mek chhunzawm zel chungchang a sawipui a; Ravi Mittal chuan, sum pek chhuah a nih tur thu leh, Khelo India aṭangin project thar pek belh theih a beisei thu a lo hrilh.

Sports Minister hian Union Finance secretary TV Somanathan pawh kâwmin, Mizoram tana Special Assistance to State for Capital Expenditure cheng nuai 20,000 pe chhuak thuai turin a ngen a; Sports Ministry hnuaia National Sports Development Fund pawh titawp lo tur leh Khelo India scheme atana sum dah tisang turin a ngen bawk.

TV Somanathan chuan, Mizoram sum tur chu pek chhuah thuai a nih theih nan hma a lak tur thu Robert Romawia a hrilh a; NSD fund leh Khelo India fund chungchang pawh a lo en chian tur thu a sawi a ni.

ICT minister ni bawk Robert Romawia chuan Department of Economic Affairs additional secretary Rajat Mishra pawh kâwmin, Tourism leh Sports atana EAP project-te sanction thuai turin a ngen a; infor­mation technology tihhmasawnna chung­chang a sawipui nghal.

Tourism minister Robert Romawia hian Tourism Secretary pawh a kâwm a; Mizoram sorkarin project a thehluh tawhte chu tifel rang turin a ngen a; Mizoram sorkarin tourism hmasawnna atana hma a laknate a hrilhfiah bawk.

Minister Robert Romawia Royte hi Delhi Mizoram House-a OSD Ajay Choudhury, Tourism director V Lalengmawia leh Sports department leh ICT department officer-te'n an ṭawiawm a ni.