KHAWTHLIR

Sadbhavana Diwas
Prime minister hlui Rajiv Gandhi pian champha pualin nimin khan Mizorama sorkar pisa hrang hrangah Sadbhavana Diwas hman a ni. Secretariat tualah additional chief secretary JC Ramthanga kaihhruaiin hman a ni a, hnam, sakhua leh ṭawng hrang hrangte inkara inpumkhatna leh inremna atana thawk tura intiamna thu an chham rual. Rajiv Gandhi pian champha hi August 20 a ni a, sorkar pisa chawlh a nih avangin amah hriatrengna hi nimin khan buatsaih a ni.

PUC-in tanpui
Pachhunga University College chuan an college kum 63 tlin lawmna atan PUC chhehvela veng panga - College Veng, ITI Veng, Bethlehem Veng, Bethlehem Vengthlang leh Venghlui local task force-te hnenah Rs. 80,800 ṭheuh nimin khan an hlân. PUC Seminar Hall-ah ṭanpuina sem inkhawm tawi buatsaih a ni a, Mizoram University vice chancellor Prof. KRS Sambasiva Rao-a'n LTF-te hnenah ṭanpuina sum a hlàn a ni.

Sikul kal tan
Mizoram sorkarin a remtih angin nimin khan Khawzawl district-a Covid-19 vei awm lohna khaw 27-ah SMC/SMDC leh village task force-te thutlukna siam angin zirlaite sikulah an kai ṭan. Sikul kal ṭanna tura tih tho, Puilo khuaah erawh chuan hripui vei hmuh chhuah thar an awm avangin, sikul hawn hun tur ngaihtuah ṭhat leh tur a ni.

Vaccine la lo tam
Hnahthial district bawrhsap H Dolianbuaia, District Task Force chairman ni bawk kaihhruaiin August 22, Pathianni khan Hnahthial DTF member-te leh village task force chairman-te an ṭhukhawm a, Hnahthial khawpuiah Covid-19 vaccine la la lo an tam thu tarlan a ni. Ṭhutkhawma tarlan danin, Hnahthial district-ah August 22 thleng khan Covid-19 vei mek mi 84 an awm a, CCC pahnih leh CCCC parukah enkawl an ni. PM Cares Fund aṭangin Hnahthial Hospital-ah PSA oxygen plant dah tum mek a ni a, tun kar chhungin a ruangám din a ni ang.