Covid-19 vanga thi 200 an tling ta

Covid-19 vei enkawl lai zingah August 22, Pathianni zan khan mi pahnih an thih belh a, nimin khan mi pahnih an thi leh bawk. Sorkar chhinchhiah angin, hripui vanga thi chu mi 200 an ni tawh a, August thla bikah mi 52 an thi tawh.

Pathianni zan dar 6:20 khan Thangruala (92) f/o Lalramnghaki, Bawng­kawn South chu hripui vangin State Referral Hospital (ZMC)-ah a thi a, nimin chawhma dar 11 khan Bawngkawn South YMA Hall-ah vui a ni. Thu dawn danin, Thangruala hi natna dang nei niin, kum hnih vel chu páwn chhuak loin a awm tawh a; Covid-19 positive a ni tih August 17, 2021 khan hmuh chhuah niin, SRH-ah dah luh nghal a ni.

Baby Chakma (13), Jamersury pawh Pathianni zan dar 8:30-ah hripui vangin SRH-ZMC-ah a thi. Thu dawn danin, Baby Chakma hi thin (liver) leh kal (kidney) ṭha lo a nih bakah, natna dang nei sa a ni a; Covid-19 vei a ni tih July 30, 2021 khan hmuh chhuah a ni a, August 4 aṭangin SRH-ZMC-ah enkawl ṭan a ni.

Pathianni zan zanlai pelh hnu, nimin zing dar 1:15 khan Lalthanmawii (50) d/o Ralliantawna, Maubawk, hripui vei enkawl lai chu SRH-ZMC-ah a thi a, nimin chhun dar 12 khan Maubawk West Presbyterian Kohhran Hall-ah vui a ni. Covid-19 vei a ni tih August 3 khan hmuh chhuah a ni a, SRH-ah admit nghal a ni. Lalthanmawii hi thin (liver) ṭha lo nei sa a ni a, damdawi-ina an inenkawl laiin damdawi-in aṭangin hripui a kái niin Maubawk aṭanga thu dawnna chuan a sawi.

Nimin zing dar 6 khan Lalengkima (36) h/o Lalhmangaihi, Kawnpui Chhimveng chu Covid-19 vangin SRH-ZMC-ah a thi a, nimin chhun dar 11 khan YMA Hall-ah vui a ni. Thu dawn danin, Lalengkima hi 1st IR police a ni a; Covid-19 positive a ni tih August 2, 2021 khan hmuh chhuah niin, August 13 aṭangin SRH-ZMC-ah enkawl ṭan a ni.