COVID-19: Mizoram dinhmun : Hripui vei 292 hmuh belh a ni

August 22, Pathianni khan Mizoramah Covid-19 vei mi 292 hmuh chhuah a ni. Pathianni zan leh nimin khan hripui vangin mi pali an thi a, nimin khan hripui vei dam tawh mi 385 chhuahtir an ni.

Covid-19 vei Pathian­nia hmuh tharte chu mipa 128 leh hmeichhia 164 an ni a; TrueNAT-PCR hmanga hmuh chhuah 12 leh Rapid Antigen Test hmanga hmuh chhuah 280 an ni. ZMC laboratory leh Fluorescent Immunoassay (FIA) hmangin swab sample endik a ni lo.

Hripui vei hmuh thar 292-te chu symptom nei 218 (74.66%) leh nei lo 74 an ni a; tualchhunga kái vek niin, kàina chin hriat loh mi 201 an awm.

IDSP record angin, Mizoramah Covid-19 vei 52,472 hmuh chhuah a ni tawh a, mipa 27,110 leh hmeichhia 25,362 an ni. Nimin tlai dar 5 thleng khan mi 46,675 (88.95%) chhuahtir an ni tawh a, mi 200 (0.38%) thi tawhin, enkawl mek mi 5,597 (10.67%) an awm.

August 22, Pathiannia sample endik dan chu - TrueNAT hmangin Siaha leh Mamit district-ah 41 leh RAT hmangin district pariatah 2,052 a ni a, a vaiin sample 2,093 a ni. Sample endik aṭanga hripui vei hmuh chhuah 292 chu 13.95% a ni a; TrueNAT-ah 29.26% leh RAT-ah 13.64% a ni.

Pathiannia district hrang hranga hripui vei hmuh chhuah dan chu - Aizawlah mi 169, Siahaah 59, Mamitah 32, Kolasib-ah 15, Lawngtlaiah pasarih, Lungleiah panga, Serchhipah pathum leh Champhaiah pahnih a ni a; Aizawla veng 46 leh khaw dang 27-a mite an ni. Hripui vei hmuh chhuah mi 292 zingah naupang kum tling lo 80 chuang telin, chu'ng zinga 60 chuangin symptom an nei a; nausen kum khat la tling lo pasarih an awm. Kum 60 chung lam mi 25 aia tlem lo awmin, an zinga 20 velin symptom an nei a, symptom nei zingah a upa ber kum 84 mi pawh a tel.

August thlaa ni 22 chhungin Mizoramah Covid-19 vei mi 13,548 hmuh chhuah a ni tawh a, chawhrualin ni tin mi 615.82 hmuh chhuah an awm ang a ni. Mizorama Covid-19 vei hmuh tawh zat 52,472 chu kum 2011 chhiarpui angin, Mizorama mi 1,000 zelah hripui vei mi 48 an awm ang a ni. Nimin khan tlai dar 5 thlengin hripui laka fihlim tawh mi 385 chhuahtir an ni a; Aizawl district-ah mi 313, Kolasib district-ah 27, Hnahthial district-ah 16, Siaha district-ah 15, Serchhip district-ah pakua, Saitual district-ah pahnih leh, Lunglei leh Champhai district-ah pakhat ve ve an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 12,502 hmuh chhuah a ni tawh a, TrueNAT-PCR hmangin 3,074, RAT hmangin 36,856, FIA hmangin 39 leh Guwahati-ah pakhat hmuh chhuah a ni tawh. IDSP tarlan danin, August 22, 2021 thlengin Mizoramah swab sample 7,91,206 endik a ni tawh a, chu'ng aṭanga Covid-19 vei hmuh tawh zat 52,472 chu 6.63% a ni. Hripui vei hmuh tawh zinga mi 48,179 chu Mizoram chhunga kái chhâwng an ni a, mi 4,293 chu Mizoram páwn aṭanga an rawn luh hnua hmuh chhuah an ni.