Lungleiah partial lockdown kalpui rel

Nimin khan Lunglei DC Kulothungan A hoin sorkar official, VC association leh YMA Sub-Hqrs hruaitute Lunglei DC conference hall-ah an ṭhukhawm a, September 4, 2021 zanlai dar 12 thleng Lungleiah partial lockdown kalpui an rêl.

Lunglei DC chuan Covid-19 do kawngah mawhphurhna neitute thawhrimna zarah leh district mipuite'n Covid-19 avanga inkaihhruaina siamte an zawm ṭhat avangin an district-ah hripui vei an tlahniam mek zel nia sawiin, "Chu­tihrualin, inthlahdah nghal mai a thiang lo. Hripui inkaidarh zel tur chhu chat tura ṭanlak hun pawimawh tak a ni," a ti a, mipuite fimkhur zui zel tur leh inkaihhruaina zawm zel turin a chah nawn.

Meeting-a tarlan a nih danin, Lunglei district-ah CCC hman mek paruk leh veng/khua 11-ah CCCC a awm a ni. January 2021 aṭangin Covid-19 vaccine pek hna ngawrh taka chhunzawm zel niin, first dose la tawh mi 87,265 leh second dose la tawh mi 31,705 an awm.

Nimin vek khan Lawngtlai District Level Task Force on Covid-19 (DLTF) pawh addl. DC Marilyn Rualzakhumthangi hoin DC conference hall-ah an ṭhu khawm a, Covid-19 laka him nana state sorkar ruahmanna zulzuia an district chhunga chawlhkar khat chhung inkhuahkhirhna kalpui dan tur an rel.

Meeting-ah hian state sorkarin Mizoram puma hman tur inkhuahkhirhna a duan sa bakah, district chhunga inkhuahkhirhna kalpui dan pangngai chu tlem siam danglam hreta chawlhkar khat chhung kalpui leh ni se, tih a ni. Lawngtlai khawpuiah chuan dawr zawng zawng zing dar 6 aṭanga chaw­hnu dar 3 thleng an inhawn remtih niin, khaw­pui chhung veng 12 zone thuma ṭhente chu ni inchhawkin an bazar ang.