MLPC Act zir chiangtute'n vawiinah HM-ah report an thehlut dawn

5th March, 2018

Mizoram sorkarin Mizoram Liquor (Prohibition & Control) Act zir chiang tura committee a din, Study Group chuan vawiin hian an report Home Minister hnenah an thehlut dawn.

Mizoram sorkar chuan MLPC Act zir chiang a, thlir lettu tur Review and Evaluation Committee chu July 2016 khan a din a, Committee hian MLPC Act zir chiang turin a la hma deuhin an hria a ni.

Committee-ah hian Excise & Narcotics Minister chairman niin, Excise & Narcotics Commissioner chu secretary a ni a, sorkar aṭangin Excise & Narcotics Secretary, Deputy Commissioner, Assistant Commissioner leh Enforcement changtu Superintendent te, Aizawl SP, Law & Judicial Deputy Secretary leh Under Secretary-te an tel.

Member dangte chu - Prof. Lianzela, Dr Lalchhuanawma Tochhawng, Dr K Lalbiakzuala, Dr C Lalhrekima, Dr Laldinliana Varte, Rev. R Lalengkima, JH Ramnghinglova, Dominic Lalhmangaiha, KL Liana, RK Thanga, Lalbiakzuala (CYMA), Vanlalrema Vantawl (MJA), Prof. C Lalkima, Rev.Dr K Lalrinthanga, Rev. R Lalrinsanga, Lalnunkunga Sailo leh Lt. Col. Lalramhluna te an ni.

Review and Evaluation Committee hnuaiah hian Study Group din a ni a, convener chu Dominic Lalhmangaihna niin, member-te chu Dr. C Lalhrekima, Dr. Laldinliana Varte (MZU), Dr. Lalbiakzuala, Salvation Army-a Lt. Col. Lalramhluna, Lalbiakzuala (CYMA) leh Vanlalrema Vantawl (MJA) te an ni. Anni hian tih tur hrang hrang intukin, MLPC Act-in nghawng a neih dan, a ṭhatna leh

ṭhat lohnate an zir chiang a ni.

Vanglaini palai zawhna chhangin Dominic Lalhmangaiha chuan an report chu ṭha thaw khat mah se, hun duh angin an neih tam loh thu a sawi a, "Ka duh dan chuan zirchianna hun hi kum 3 tal nise, chumi chhung chuan research awm reng se a ṭhat ka ring. Kan zir chin hi chu a ṭha thawkhat viauin ka hria, mahse hun a tlem avangin duhthusam chu a ni lo," a ti.

Congress party office bearer-te June 10, 2016-a ṭhukhawm chuan resolution pass in, MLPC Act, 2015 zir chiang tura sorkarin Review & Evaluation Committee din se an duh thu an tarlang tawh a ni.

MLPC Act hi January 15, 2015-ah hman ṭan a ni a, he dan hmang hian March 16, 2015-ah zu zawrh ṭan a ni.