KṬP General Conference a ṭiak

KṬP General Confe­rence vawi 58-na, March 1, Ningani atanga West Phailenga neih chu nizan khan a ṭiak. Conference ah hian Mizoram pumah HIV/AIDS chungchanga inzirtirna kalpui mek chu chhunzawm zel an rel.

Inrinni khan nileng­in West Phaileng Chhim­veng biak-inah rorel inkhawm neih a ni a, Central KṬP leader Rev. Zothansanga'n a kaihruai. HIV/AIDS chungchanga inzirtirna neih mek hi chhunzawm zel ni rawh se, an ti a; CKṬP-in an lo bawhzui turin dah a ni.

Youth Recreation Centre (YRC) puala KṬP member tinin sum thawh khawm leh relin, Aizawla member tinin Rs. 50, district khawpuia mite'n Rs. 30 leh khaw dang zawnga member tinin Rs. 20 ṭheuh thawh turin an rel. YRC pual vek hian Thawhṭanni zana KṬP inkhawm vawi khat thawhlawm dah ni se, an ti a; chutih rualin, YRC kalpui mek chu zangkhai zawk leh chhawr hma zawk a nih theih nan tih­danglam rawtna an pawm.

Kum 2018 Mizoram MLA general election pual te, sual thupha chawi nan leh ruihhlo ngai leh member hláte pualin ram pum huapa ṭawngṭai rual an rel a; kum 2019-2010 kumpuan thupui atan 'Kristian nun - Takna' tih an thlang.

Kum 2022-a General Conference neihna atan Kolasib an thlang a, a hun chu March 3-6 a ni ang.

Synod moderator Rev. F. Lalrinnunga kaih­hruaiin kum 2018-2020 chhunga hruaitu turte thlan a ni a, mi 20 thlan chhuah an ni.

KṬP Conference-ah hian Inrinni zan aṭangin speaker Rev. Van­lal­zuata'n thupui 'Isua chhinchhiahna put' tih a sawi ṭan a, nizan khan CKṬP Leader kal chhuakin thuchah a sawi.

Kumina KṬP General Conference-ah hian nimin chawhma dar 11 thleng khan palai riak lut 21,456 leh lehlanga kal 4,527 an awm a, nimin chawhnu lama thlengte pawh an awm a; mikhual thleng tam berin mi 130 chuang a thleng.

KṬP-ah hian pastor bial 205 -ah member 1,47,664 an awm a, mipa 92,220 leh hmeichhia 55,445 an ni. Member zinga 1,44,291 chu Mizoram chhunga mi an ni a, 3,374 chu Mizoram pawn lama mi an ni.

2018-20 CKTP OB-te chu leader - Rev. Dr. K. Lallawmzuala (Synod ruat), assistant leader - Upa Rosangliana, Electric Veng bial; general secretary Rochungnunga (Synod ruat); assistant secretary T.Upa Ricky Lalrammawia Ngente, Bawngkawn Bethel bial; treasurer Dr. Lalrotluanga, Zonuam bial leh finance secretary Lalmuanawma, Kulikawn bial te an ni.