Zofate Chawlhbuk kan sa leh dawn - MZP

Bairabi khawtlang chuan Assam leh Mizoram ramriah MZP-te'n Zofate Chawlhbuk sa tawh lo se an duh. Hetihlai hian MZP chuan ramriah hian Zofate Chawlhbuk sak leh an tum.

Vanglaini palai zawhna chhangin Bairabi khawtlang hruaitute chuan MZP-in ram humhalh tura an hmalakna chu an thlawp thu an sawi a, "Mah se, chawlhbuk hi chu rawn sa tawh kher lo se kan duh. Ramriah buaina a awm phah a, buaina a awmin Mizoramin kan ngam lo zawk zel si. MZP thil tih avang hian sorkarin ramri humhalh kawngah nasa zawkin ṭan la se kan duh a ni," a ti.

March 2-a MZP ten Zofate Chawlhbuk an sak ṭumin an puih thu sawiin Bairabi khawtlang hruaitute chuan, "An sak hnuah police-te an lo kal a, buaina awm ngai lo kha kan buai phah. Kan nulate pawh ramah an kal ṭha ngam tawh lo a ni. MZP hmalakna hi thlawp viau mah ila, buaina a awm tawh lohna atan chawlhbuk hi chu sa tawh lo se kan duh," a ti a, MZP-ten sak luih an tum a nih chuan dan erawh an tum loh thu an sawi.

MZP-te'n chawlhbuk an saknaah hian Assam chuan police duty post an siam a; hei hi Bairabi MSU hruaitute chuan Zirtawpni khan kal chilhin an tichhia a ni.

MSU Sub-Head­quarters, Bairabi president Laldinsanga chuan, "Mizoram Sawrkar leh Assam a inrem hma chu Mizoram leh Assam lam aṭangin tu mahin kut thlak loin, a phawvuakah mai mai buai lo ila, chuti lo chuan a affected area-te tan harsatna kan siam mai mai a ni," a ti.

Hetihlai hian MZP chuan thuchhuah siamin, "Assam-in Mizoram chhung­ah hna rawn thawka police duty post an rawn siam hi MZP chuan nâ a ti a, hetianga kan ram chhunga an rawn che hi kan dem hle. Assam sorkarin hna an rawn thawhna hi Mizoram chhung, Mizoram chief minister hmasa ber Pu Ch Chhunga ram a ni a, a nupui Pi Lalrothangi'n MZP hnena a pek a ni," an ti.

MZP chuan Mizo-ram sorkar a ngawi reng mai leh Zofate Chawlhbuk Assam-in an ṭhiah thuah pawh engmah hre lo ang maia a awm chu pawi an tih thu leh an dem thu an chhuah.