Zoramin damdawi thar a duh - Lalduhoma

Ṭangrual Pawl ZPM chuan Inrinni Zemabawk Middle School Venga Lalkaisanga ina mi thar lawmluh inkhawm an buatsaih a, thusawitu ZNP president Lalduhoma chuan Zoram mipuiin damdawi mum thar a duh thu a sawi.

Inkhawm hi ZPM MS Veng chairman Lal­muankima'n kaihruaiin, Lalduhoma chuan Mizoram mipuiin kum 34 chhung damdawi mum hnih kan in ei chhawk ngar ngar thu sawiin, "Dam lam aiin nat zual lam kan pan zel a. Damdawi mum thar mipuiin an duh tawh a ni. He kan hnam natna vei avang hian kan sakhaw puithiamte, kan ṭhalai mi thiamte, sorkar hnathawkte an mangang em em a ni,” a ti.

Ṭangrual Pawlin hian sorkar kalphung thar din a tum thu sawiin Lalduhoma chuan, "VIP inti lal lutuk avanga mipui harsatna awm ṭhin hi tihbo a ni ang a, CM pawh tiamin mi pakhatin sorkar motor pakhat bak kawl a rem lo ang," a ti a, Val Upa Council-in sorkar ruangam a din ang a, a vil zui dawn a ni, thu a sawi.

Thusawitu dang ZPM general secretary K Sapdanga chuan, "Mizoramin harsatna a tawh dan chipchiar chu Ṭangrual Pawl hruaitute aiin Mizoram mipuiten an hre chiang zawk a ni. State dang aia kan hnufual reng chhan hi hruaitu ngaiin ro an rel rei tawh vang, ngaia neih an ngah tawh luat vang a ni,” a ti.

ZPM thuchhuah tarlan danin, Zemabawk MS Vengah hian ZPM hi mi 150 in an zawm thar a, kar kalta khan Chalfilh bial Sesawngah mi 267 an lawmlut bawk a ni.