Water Supply Scheme Phase III zawh hunah tuiah kan buai tawh lo ang - SIPMIU

State Investment Programme Management and Implementation Unit (SIPMIU), Mizoram hotute chuan Asian Development Bank aṭanga Water Supply Scheme Phase III thawh mek chu kum 2019-ah zawh hman an tum thu sawiin, "He hna hi thawh zawh a nih chuan kum 15 lo kal leh turah pawh kan buai tawh lo ang," an ti.

Vanglaini palai zawhna chhangin SIPMIU programme director Valbuanga chuan, project an kalpui mek, 'Augmentation of Water Supply and Construction of 37 mld (million litres per day) Water Treatment plan for Aizawl phase III" hi April 2017 aṭanga thawh ṭan a nih thu sawiin, "June 2019 thleng thawh a ni dawn. SIPMIU Mizoramin hna an thawh hi ADB leh Ministry of Housing & Urban Affairs aṭangin kum khatah vawi hnih rawn endik ṭhin niin, quarterly progress review meeting pawh an nei ṭhin. Hnathawh ṭhat dan azirin pawisa hi an rawn pe ṭhin," a ti.

Valbuanga sawi danin, Mizoram hian phase hmasa lam a thawh ṭhat avangin sum pawh an dawng ṭha a, ministry lam pawhin ruahmanna an rawn siampui a ni. Phase III a hman tur pipe lian pawh 50 % chuan Mizoram a lo thleng tawh a, Tlawng lui kamah pawh a hmunhma tur laih a ni tawh. SIPMIU chhut dan chuan kum 2033-ah chuan Aizawl mipui hi nuai 4.5 an tling turah ngaih a ni a, tui mamawh tur hi 71.8 mld a ni pha turah an ngai a ni.

Central aṭanga ADB pawisa, North East State pangain an dawn hi a vaiin vaibelchhe 1,390.64 a ni a, Aizawl tan vaibelchhe 330.07 ruahman a ni.

Project hi ṭum thumah ṭhen niin, project hmasa ber project I hi vaibelchhe 37.02 senna niin, June 2012-ah ah zawh tur niin, North East State 5 te chuan an hna an zawh vek phawt zel a ngaih laiin, state dangin an zawh har avangin ṭum thum pawhsei a ni a; Mizoram chuan zawh hun tura tih June 2012 hma hian an zo hman thung.

India hmarchhak state zinga ADB sum dawngtute chu Agartala (Tripura), Aizawl (Mizoram), Gangtok (Sikkim), Kohima (Nagaland) leh Shillong ( Meghalaya) te an ni.

Heng state zingah hian Mizoram leh Tripura tih lohte chuan an project hmasa lam an thawh ṭhat loh avangin pawisa hi an dawn chhunzawm tawh lo. Project II hi June 2018 ah khan zawh tur niin, Mizoram tan hian vaibelchhe 151.00 ruahman a ni a, June 2019 thleng pawhsei a ni a, Mizoram chuan hna a thawh ṭhat avangin project II a kal mek laiin project III hi ADB aṭanga thawh leh nghal phal a nih avangin kum 2017 April aṭangin thawh leh nghal a ni. Mizoram tana Phase III bika sum ruahman zat chu vaibelchhe 141.87 a ni.