KHAWTHLIR

Khawmpui tiak
UPC North East India District Conference vawi 68-na Maubawk biak-ina neih chu nizan khan a ṭiak. Inrinni khan rorel a ni a, hetah hian kum 2023 thlenga conference neihna tur ruat lawk a ni a, chungte chu Durtlang, Chaltlang, Kolasib Diakkawn, Headquarters leh Thenzawl bialte a ni. Thutlukna siam zingah chuan, kohhran mite fa nei tam tura uar zawka inzirtir ni se tih te, Pentecostal Men Fellowship din theihna apiangah local church board hriatpuiin din ni se, tihte a tel a ni.

Medical education
Aizawl Civil Hospital hnuaia Clinical Research Unit (Homeopathy) chuan, nimin khan Aijal Club-ah Continuing Medical Education Programme an buatsaih a, Mizoram hmun hrang hrang aṭangin homeopathic doctor 50 an tel a, central lam aṭanga mithiam lo kalte'n homeopathy hmanga natna hrang hrang enkawl dan an zirtir.

Gender issue zirna buatsaih
Aizawl Diocese-a Catholic Hmeichhe Pawl chuan Inrinni khan Kulikawna Christ The King Cathedral Hall-ah 'Seminar on Gender Issues' an buatsaih. Seminar-ah hian DIG Joseph Lalchhuana leh Women Commission secretary sister Lucy Laltluangi-ten thupui thlan chhuah pathum, hmeichhe hmanga sumdawnna, trafficking of women & sexual abuse tih te, hmeichhe mangangna tawkte leh hmeichhiate kohhran rawngbawlna biak-ina an tel ve pawimawhna, tihte an sawi a ni.

Legal Camp
Siaha District Legal Services Authority leh State Legal Sevices Authority ṭangkawp chuan, nimin khan MADC Forest Hall-ah Legal Service Camp an buatsaih a, MADC CEM N Zakhai-in a hmanpui. Camp-ah hian Siaha district-a office pasarih, bank pahnih leh tlawmngai pawl pahnihten topic thlan bikah an hmalak tawhna leh hmachhawp hrang hrangte a lem nen an sawifiah a, an stall tlawhtute zawhna hrang hrangte chu chhangin, sawifiah ngaite an sawifiah nghal a ni.