NLUP hlawmchham-ah puh

MNF chuan Inrinni khan Zawlnuam khuaah SEDP zirhona an buatsaih a, thusawitu MNF vice president Dr. R Lalthangliana chuan Congress flagship programme NLUP chu hlawhchhamah a puh.

Dr. R Lalthangliana chuan NLUP hlawhchhamzia Congress-te pawhin an hriat chian thu sawiin, "CAG report meuh pawhin NLUP hlawhchhamzia mualpho takin a chhuah tawh. Hetihlai hian mipui bum tumna leh thiam inchan chawp tir tumin, a hlawhtlinna chu dawt phuahchawpin an tarlang nasa a, NLUP hotute chu television lamahte interview hmachhawn tirin India rama project ṭha ber leh hlawhtling berah an sawi tir a, kut pui meuh siama lawm an tum hi thil zahthlak tak a ni," a ti.

MNF Vice President chuan Congress sorkarin kum 1998 MLA inthlan dawnah cheng hnih pe a, sorkar tuka cheng nuai khat sem turin an inzuar nia sawiin, " Sorkar tuka sem chu sawi loh, 1998 kum tawpa sorkarna siam tawh kha, kum 2009 leh 2010 ah pawh an la sem lo a, kum 2011 ah mi tlemte hnenah tlemt e tein an sem tan thei chauh a. Kum 10 chhung hian din chhuahpui tham loh, instalment-in cheng sing hnih khat lek lekin an pe kim thei tawk a ni," a ti a, inthlan kuma NLUP kutpui siam tum chu mipui bumna a nih thu a sawi.