Agriculture Minister-in sorkar hmalaknate a tlawh

Agriculture minister KS Thanga chuan, Inrinni khan Kolasib district-a Chemphai hmuna sorkar hmalakna hrang hrang a tlawh a, sorkar official-te nen harsatna awm thei leh a sutkian dan tur an sawiho nghal.

KS Thanga hian North Chawnpui to Phaidam zaua agriculture link road laih mek a tlawhnaah Agriculture department hotute nen hnathawh kal­phung tlangpui leh harsatna hrang hrang awm theite sawihoin, a sut kian dan tur te pawh ngaituah nghal turin offcial-te a chah. He link road hi km 2-a thui niin NEDP aṭangin cheng nuai 10 senga laih a ni.

KVK Agriculture farm a tlawhnaah KS Thang hi KVK senior scientist Dr. Michelle C.Lallawmkimi'n an hmalaknate a lo hrilhfiah a, an thil mamawh leh harsatna hrang hrang an neihte a thlen nghal.

Irrigation & Water Resources Department hmalakna hnuaia kuthna­thawkte tana tui khawlna tur hmun siam mek pawh KS Thanga hian a tlawha , thawktute'n tui lakna kawng siam mek leh tui khawlna hmunte chu a hnathawh dan tur kal­phung an lo hrilhfiah a ni.

Chemphai Lift Irrigation Project hi NABARD sum cheng nuai 174.30 senga siam a ni a, hectare 70 a zau niin kuthnathawk chhungkaw 30-in an chhawr thei dawn a ni.