Zofate Chawlhbuk sak nawn Bairabi khawtlangin duh lo

Bairabi khawtlang hruaitute kalkhawm chuan, Mizo Zirlai Pawl (MZP)-in Bairabi-a Zofate Chawlh­buk sak an tum chu sak tawh loh ni se, tiin an rel.

Bairabi Joint VC huaihawtin Bairabi Joint VC leh Bairabi All NGO hruaitute chu Inrinni zing khan Hmarveng Library, Bairabi-ah an ṭhukhawm a; MZP-in tun hnaia Zofate Chawlhbuk an sak, Assam Forest leh Assam Police ten an ṭhiahna hmunah boruak ṭha lo a chhuah lohna turin Chawlhbuk din tawh loh ni se, tiin thutlukna an siam.

Bairabi khawtlang hruaitute hnen aṭanga Vanglaini thu dawn danin ramria awm an nih avangin ramria buaina thlen thei tur chi zawnga hmalak chu an duh lo a; MZP-in ramri humhalh an duhna chu an thlawp rualin ramria chengten an tawrh theih avangin Chawlhbuk sak hna hi chhunzawm tawh lo turin an duh a ni.

Bairabi Hmar Veng VCP J Lal­chhuanawma chuan, "Ramri hum­halh hi kan duh a, MZP hmalakna pawh hi kan thlawp tlat a ni. Chutih rualin Chawlhbuk sak hi chuan Bairabi khawtlang mipuiah harsatna a thlen thei a, tunah pawh a thlen mek tawh avangin sak tawh loh hi kan duh dan a ni a, chu chu kan thutlukna a ni," tiin a sawi.

Vanglaini zawhna chhangin Lalchhuanawma chuan, "Chawlh­buk sakna hmun leh a chhehvelah hian Bairabi khaw pa kher lo pawhin leilette neiin huante an nei hlawm a, ramriah boruak ṭha lo a awm chuan leiletah pawh an kal ngam lo ṭhin. Hei mai hi a ni lo a, helai hmun paltlang hian ram kan kal a, chakaite kan khawrh a, thingte kan phur ṭhin a, tun hnaia boruak a inmûn hnu hian hmeichhe thing phur tur an chhuak ngam lo a, mipui nawlpui pawh an ralṭi a, kan eizawnna thlengin a tuar thei a ni," a ti.

Bairabi khawtlang hruaitu kal­khawm chuan ramri buai chu pawl mala bei loa a huhoa intelkhawm chi a nih thu an sawi a. Ramri chung­changah hmalak ngai a awm a nih pawhin khawtlangin an lo buaipui tawh ṭhin angin kalpui leh ni se, pawl pakhatin kalpui lo se, tiin an rel.

Bairabi Joint VC leh All NGO-te chuan ramriah buaina a awm chuan a theihtawpa ṭan an inhuam a; nimahsela Zofate Chawlhbuk sak erawh chhunzawm tawh loh an duh thu an sawi thung. Bairabi All NGO hruaitute chuan Mizoram sorkar chu ramri buai chungchang ngaihven tur leh, a rang lama hmala turin an phut bawk a ni.