Kan sorkar chhung chu NLUP Kan kalpui dawn - CM Hawla

Mizoram sorkar chuan vawiin aṭang hian ni thum awh tur NLUP Kutpui a buatsaih dawn a; kut hman tur pual hian chief minister Lal Thanhawla chuan thuchah a tichhuak a, an sorkar chhung NLUP an kalpui tur thu a sawi.

Chief Minister chuan 2008-a sorkarna an siam hnuah NLUP atan sorkar laipuia minister leh mi pawimawhte an hmin thu sawiin, "Kan hotuten cheng vbc. 1500 an dil a, anniin ngun taka an ngaihtuah hnuin, 'anni chu an inthlahrung a nih hi,' an ti a, 'agriculture link road leh godown-te an mamawh ang,' an ti a, 'chuvangin cheng vbc. 2813 hi kan chhut dan chuan an duh khawp tawk velah kan ngai a ni' an ti," a ti.

Lal Thanhawla chuan NLUP chuan sor­kar hnathawk lian leh sum­dawng hausate a zawn loh thu sawiin, "A dawngtute pawhin chu mi rilru pu chuan dawng se ka duh a ni. Kan sorkar chhung chuan kan kalpui zel ang kan ti a, tunah pawh hian chhungkaw 16,000 hnenah pek tur kan buatsaih mek," a ti a, a ṭul chuan an tih­pun chhoh zel tur thu a sawi.

Mizoram chu GSDP-a tiṭha ber pali zingah a tel thu sawiin CM Hawla chuan, "NLUP dawngtu zawng zawngte leh a hlawhtlinna atana line department thawktu zawng zawngte chungah lawmthu kan sawi tak zet. An rinawmna, dikna leh an ṭhahnemngaihnate avangin vawiinah hian India rama state 29 zingah hmasawnna lama ṭhannaah a tiṭha zingah kan tel theih phah a, anmahni vang hi a ni kan ti lo thei lo a ni," a ti.

Chief Minister chuan kuthnathawktute tel loin tu ram mah a awm thei lo tih sawiin, "Hei vang hian January 14 hi Kuthnawktute Niah kan puang a, kan hmang ṭhin a ni. Kuminah erawh kan hmang lo a, NLUP kutpui kan phak tawk anga ropui taka buatsaih kan tum avangin a hrangin kan hmang lo," a ti a; Mizoram chu ei ṭawk ṭawk economy aṭanga market economy-ah hlan chhoh an tum thu a sawi.