Mizorama kir duh Bru chhungkaw pahnih an awm

Tripura Bru refugee camp paruk aṭanga Mizoram mi, Mizorama lo kir duh te hming lak khawmnaah Kolasib district-ah let duha hming pe lut pahnih an awm a; Mamit district leh Lunglei district-a let duh hming pe lut pakhatmah an awm loa,

Thudawn danin, kir duh an awm leh awm loh zawt tur hian Mizoram sorkar official-te Tripura refugee camp-ah hian an kal a ni. Mamit leh Lunglei district aṭanga kalte hnenah chuan hming pe lut an awm loa, Kolasib district aṭanga kalte hnenah chuan chhungkaw pahnihin hming an pe lut a ni.

November 23, 2016 enfiah zawh takah Mizoram mi awm zat hmuh chhuah chu an vaiin 32,857 an ni a, heng zinga 23,280 te chu puitling an ni a, a bak 9,577 te chu naupang an ni.

Mizorama an lo kir huna dahna turin Lunglei district-ah khaw pali, Kolasib district-ah khaw 10 leh Mamit district-ah khaw 48 ruahman a ni.

Vanglaini palai zawhna chhangin Home dept. hotute chuan, Bru-te hruaikir tur hian theihtawp an chhuah thu sawiin, "An rawn kir duh miau loh avangin tih ngaihna a awm lo a ni," an ti.