KHAWTHLIR

Library Week
Pachhunga University College (PUC) buatsaih, Library Week chu nimin khan MZU resgistrar C Zothankhuma'n PUC Library-ah a hawng. Week chhung hian college zirlaite tan painting competition, book mark and badge design competition, essay writing competition leh ziakmite kawmna (meet the author) buatsaih a ni dawn.

In sak sak
Joseph Lalṭhakima, Khawzawl Hermon Veng chu March 1, 2018 ah an in a kan avangin an veng VC hmalaknain nimin khan in sak sak a ni a, a dung ft. 24 leh a vang ft. 15-a zaua sak a ni. In sakna châk leh hmanruate chu mi tlawmngaite thawh khawm bakah rama mi lak a ni.

NLUP Kut tel tur
Chief Secretary chuan thupek chhuahin, NLUP Kutpui hawn inkhawm vawiin chawhma dar 11-a Assembly Annexe conference hall-ah neih tur leh kut kharna hun a hmun ngaiah vek March 9 chhun dar 1:00-a neih turah Mizoram sorkar hnuaia secretary leh head of department zawng zawngte chu tel vek turin a hriattir.

Tlan khap
Lunglei Addl. SP chuan thupek chhuahin, Lung-lei - Thenzawl - Aizawl kawnga Pukpui leh Tlawng inkar cement concrete-a siam a nih avangin lirthei lian HMV zawng zawngte chu NH-54 (Lunglei - Serchhip - Aizawl) kawngah tlan vek tur a nih thu a tarlang a, "March 10 hnu lamah chuan concrete chhun hi a tak taka kalpui ṭan a nih dawn avangin motor eng chi mah tlan a rem tawh dawn lo," a ti. Thupek hian hnathawh zawh hma a huam ang.

Chokhlei Kut
March 8-9 chhunga Sentetfiang, Lawngtlai district-a Chokhlei Kut (Rhododendron Festival) hman tur atana inbuatsaihna hrang hrang nimin khan Lawngtlai DC Dr. Arun T hoin DC conference hall-ah thlirho a ni. Kut Organising Committee-in sub-committee hrang hrang a dinte leh mawhphurhna neitute’n hma an lak dan ngaihthlak a ni a, kut atana inbuatsaihna chu tluang takin a kal chho mek zel tih tarlan a ni.