Sum siamna atan GPF an hmang - ZNP President

ZNP president Lalduhoma chuan nimin khan an party pisa-ah thu a sawi a, Mizoram sorkar chu GP fund sum siamna atana hmanga a puh a, titawp turin a phut.

Lalduhoma chuan sorkarin sum harsatna namen lo a tawh laiin GP fund withdraw phalsak theitu bik siam a ni tih sawiin, "Quota-te neia sum siam nana an hmang hi titawp nghal turin Mizoram sorkar kan phut a ni. Sorkar hnathawkten thla tin an hlawh atanga GPF-a an dah ṭhin hi, anmahni ta liau liau a ni a, sorkarin a lo puksak mai a ni,” a ti.

Sorkar hnathawkten GPF lak chhuah an duh chuan Head of Office/DAO te phalnain an la chhuak ṭhin tur a nih thu sawiin ZNP President chuan, "Congress sorkarin rules kalhin ruahmanna an siam. GPF withdraw duhte'n quota neihote hi an tlawn a, an lakchhuah theih nan eng emawzat an pe ve ṭhin tih thu a ri ring hle mai," a ti a, GPF kalpui a nih dan chu corruption a nih thu a sawi.

ZNP President sawi danin, dearness allowance chu sorkar hnathawkte tan central sorkarin January 1, 2006 aṭangin kum khatah vawi hnih zel, January 1 leh July 1-ah pek turin a ti a. Mizoram sorkar chuan January 1, 2009 aṭang chauhin a pe ṭan thei a ni. Dearness relief pawh pensioner-te hnenah January 1, 2006 atangin kum khatah vawi hnih, January 1 leh July 1-ah pek tur a ni, Mizoram sorkar chuan July 1, 2008 aṭang chauhin a pe ṭan a n.

Lalduhoma chuan, DA leh DR rate chu a chang changin ennawn a nih ṭhin thu sawiin, "DA pung hi tihluihnain sorkarin an GPF ah a dah luihsak ṭhin. Central-in DA leh DR te hi a rawn release hnuah pawh Mizoram sorkar chuan pe mai loin, rei tak tak a hrensak ṭhin. Pensioner-te DR phei hi chu sorkar hnathawk DA an dawn rualin an dawng ve ngai lo a, an hrensak rei bik ṭhin a ni," a ti.