Zoram mipuiin Congress an hnawl tawh ngeiin ka ring - Tawnluia

MNF chuan nimin khan Mizo Hnam Runah chhung inkhawm an nei a, thusawitu sr. vice president Tawnluia chuan Congress party chu Zoram mipuite'n an hnawl tawh ngei a rin thu a sawi.

Tawnluia chuan tun hnai North East state pathum inthlanah Congress chu mipuiin an hnawl nia sawiin, "India ram pumah Congress sorkarna a awm ta mang lo a, India ram puma opposition-te huikhawm tur pawhin rin an hlawh tawh lo. India ram hmun dang ang bawkin Zoram mipuite pawhin Congress party hi an hnawl tawh ngei kan ring a ni," a ti.

MNF Sr. Vice President chuan India sorkarin Mizo miuite tihchimit tumin indo thlawhna hmangin a beih thu sawiin, "Min beihna ni March 5, MZP-in 'Zoram Ni' atana an hmang hi a lawmawm hle," a ti a, nunau pawisawi lote nen lam min bomb chilh a, khua leh tuite indo thlawhnaa bomb hmun dangah an awm a hriat ngai loh thu a sawi.

Thusawitu dang MNF vice president R Tlanghmingthanga chuan mahni nunna thapa Pathian leh ram tana martar-te leh hnam sipaite chawimawi leh zah an ?ul thu sawiin, "Taksaah leh thinlungah Mizo nihna kan chian thar a ngai hle. Mizote enkawl tura Mizo pa aia Delhi vai thununte rintlaka ngaihna awm hi a dik lo hle a ni," a ti a, Mizo zawng zawng chu MNF vek kan nih thu a sawi.