MZP-in Zoram Ni an hmang

MZP chuan nimin khan Lal Thanhawla Auditorium-ah Zoram Ni an hmang. MZP chuan India sorkarin sipai chakna leh jet fighter hmanga Aizawl khawpui leh Mizoram hmun hrang hrang a beih champhapha March 5 chu Zoram Ni atan an puang a, he ni pual hian kum 2008 aṭangin hun an hmang ṭhin a ni.

Inkhawm hi MZP vice president B Vanlaltana'n kaihruaiin, MZP president L Ramdinliana Renthlei chuan Zoram Ni chu political party leh eng pawl mah tihthinurna atan leh tute tan maha rilru nat thar nana hun hmang an nih loh thu sawiin, "He ni kan hman chhan chu, Zofate tan inpumkhat leh zual nan te, kan tawrhna avangin inunauna ṭha leh Zofate inpumkhatna ṭha thleng se kan tih avang a ni. Ṭhangtharah ram leh hnam hmangaihna dik tak intuh se kan duh a ni, "a ti.

MZP President chuan zalenna sualtute khan mahnia ro inrelna neih duhna thinlung an put vangin MZP chuan an chhuan thu sawiin, "Zalenna an sual tak tak a ni. Mizoramin zalenna a sualna chhan hi kawhmawh bawl vang emaw sual vang hrim hrim a sual kan ni lo a, zalenna tluantling min awp bettute aṭanga neih kan duhna avanga he thil hi lo thleng a ni," a ti a, rambuai laia kan tawrhnate kha mi ṭhenkhatin sawi nep tum mah se, sawi nep theih a nih loh thu an sawi.

Inkhawmah hian mi thiam hrang hrangte'n paper an buatsaih zirho a ni.