Vawiinah Mizoram sorkar leh HPC (D) an inbe dawn

Mizoram sorkar leh Hmar People Convention (Democratic) aiawhte chu vawiin chawhma dar 11 hian State Guest House, Aizawlah inremna zawngin an inbe dawn. Mizoram sorkar leh HPC(D)-te hi ṭum eng emaw zat official level-ah an inbe tawh a, ṭha takin an inbe thei. Vawiin hian political level-ah an inbe leh dawn a ni.

Mizoram sorkar leh HPC(D)-te political level-a an inbiakna turah hian Mizoram sorkar aiawhte chu political adviser to chief minister Lalrinmawia Ralte leh Mizoram Law Commission chairman John Siamkunga, MLA ten an ho dawn a; official level-a inbiaknaa telte bakah, inremna atana pawimawh tur sorkar secretary-te pawh an tel ang.

HPC(D) aiawhte chu working chairman LT Hmar-in a ho dawn a, ruahman lâwk ang chuan LT Hmar bakah mi dang 10 tel tura tih ni mah se, damlohna vangin pakhat a tel thei dawn lo. Inbiaknaa tel turte hi pali chu Manipur aṭanga lo kal tur an ni a, a bak zawng chu Mizoram mi an ni.