Chief Minister-in NLUP Kûtpui a hawng

Mizoram sorkar chuan nimin khan Assembly Annexe-ah NLUP Kûtpui an buatsaih ṭan a, chief minister Lal Thanhawla'n a hawng. NLUP Kûtpui hi March 9, 2018 thleng neih a ni ang.

CM Lal Thanhawla chuan, NLUP chu sawisel awm ṭhin mah se, an tihchhiat theih loh thu sawiin, "Kum 2009-2010 velah khan Mizorama political party panga, BJP pawh telin Prime Minister hnenah NLUP titawp turin an thlen a, tihtawp a hnêkin min ṭanpui zawk a ni," a ti a; sorkar laipuiin NLUP chu entawn ve turin state dangte a râwn zawk niin a sawi.

Chief Minister chuan, NLUP chu a ṭha zawng leh a chhe zawngin a lâr hle tih sawiin, "Rinawmna, dikna leh taimakna nena dawngtu hlawhtling tam tak an awm. Zelthel leh hmang mai mai chu an awm ngei. Dik taka hmangtute chu an hlawhtling tlangpui a ni," a ti.

Mizoram chhunga mi tam zawkte chu kut hnathawktute an la nih thu sawiin CM Hawla chuan, "Chung mite lamṭang prog­ramme NLUP hi sorkar chuan la chhunzawm zel ṭha a ti a ni. Kut hnathawktute chawimawi leh chawisan hi kan duh ber a ni a, an tel lo chuan kan kal thei lo. NLUP Kûtpui pawh hi kut hnathawktute tana buatsaih a ni," a ti.

Mizoram University-a assistant professor Dr James LT Thanga buatsaih, 'Sustainable Land Use Initiatives in Mizoram' tih chu Chief Minister hian a tlangzarh a ni.

State Planning Board vice chairman H Liansailova pawhin thu sawiin, 'Sem policy a ṭha lo, NLUP a hlawhchham' tihte a rîk rin thu a sawi a, "Kan unaute dinhmunah indah ila, pawisa lo chuan an intuam hlâwm zo tawh lo. Pawisa an hman dan enzui a, an kal zel dan tur ngaihtuah erawh a ṭul," a ti.

NLUP kalpui tirhah a hnawh­sarum deuh tih sawiin H Lian­sailova chuan, "Hei vang hian hlawhchham deuhna lai chu a awm," a ti a; NLUP dawngtu tur thlan danah, "Kan hruaitute'n a tihlawhtling thei tura an ngaihte an thlang a ni," a ti a; NLUP dawngtu zawng zawng Congress ni se chuan political party dang tan kal ngaihna a awm loh tur thu a sawi.

NLUP Kûtpui pual hian Assembly Annexe building chhawng hrang hrangah NLUP line department 10 hnuaia kut hnathawktute leh hma latute'n dawr 100 chuang an hawng a, NLUP hlawhtlinna hrang hrangte hmuh theiha tarlan a ni.