Meghalaya CM lak luhnaah Zoramthanga a tel

MNF president Zoram­thanga leh treasurer Vanlalzawma-te chuan, nimin khan Meghalaya chief minister thar Conrad Sangma lak luhna hun an hmanpui. MNF chuan, Congress party rorelna chu India ram hmun dang ang bawkin Meghalaya-ah paihthlak a ni ta, an ti.

Meghalaya-ah hian Lok Sabha speaker hlui PA Sangma fapa, Conrad Sangma kaihhruai National People's Party (NPP), BJP leh party dangte'n sorkarna an siam a; CM lâk luhnaah hian tel tura sâwm an nih angin Zoramthanga leh MNF hruaitu dangte an tel ve tih MNF thuchhuah chuan a tarlang.

MNF thuchhuah tarlan danin, Zoramthanga leh amah ṭawiawmtute hi Nagaland sorkar thar, Nei­phiu Rio kaihhruai lak luhnaah pawh an tel dawn a; Tripura-a sorkarna siam­naa tel ve tur tualṭo party, Indigenous People's Front of Tripura (IPFT) hotute sâwmna angin Tripura sorkar thar lâk luhnaah an kal bawk ang.