KHAWTHLIR

Hringnun Hrualhrui
Mafaa Hauhnar lehkhabu ziah, 'Hringnun Hrualhrui (Thu haw lam leh kal lam)' tih chu nimin khan Central YMA Hall-ah R Lalrawna'n a tlangzarh. Lehkhabuaah hian thu leh hla hawi lam inang lo tak takte a awm a, Rs. 200 man a ni.

Kawng enho
Work Coordination Committee on Junction Improvement-te chuan, nimin khan Dawrpui Vengthara Dinthar panna pêng râwt hniama zauh dan tur an enho. Committee member-te hi Dinthar Local Council, Dawrpui Vengthar Local Council, Aizawl West-II Block Congress hruaitute leh kawng zauh tumin a huam chhunga in leh lo neitute'n an ṭawiawm a ni.

Legal Camp
Mamit District Legal Service Authority chuan, nimin khan Mamit College-ah Legal Service Camp an buatsaih a, Mamit DC Lalbiaksangi'n a hawng. Camp-ah hian Mamit khawpuia sorkar department hrang hrangte'n an hmalakna pholanna stall an hawng a, an hnathawh leh hmalaknate kalkhawm mipuite an hrilhfiah a ni.

Lungphùm phúm
Chaltlang leh Durtlang inkalpawhna tura ruahman ropeway lungphum chu Thawhṭanni khan Tourist Lodge, Chaltlangah Tourism minister John Rotluangliana'n a phúm. Ropeway hi km. 2.23-a sei a ni dawn a, mi 24 chuan theihna tur niin, minutes 8 chhunga thlen theih tura ruahman a ni. Ropeway siam hna hi Leading Edge Pvt.Ltd. ten an thawk dawn a ni.

Wildlife Warden
Principal Conservator of Forests (Wildlife) leh Chief Wildlife Warden ni bawk Rosiama Vanchhawng chu pension-a chhuah avang­in, Additional Principal Chief Conservator of Forests (Administration & Vigilance) Liandawla chu Chief Wildlife Warden atan ruat a ni.