Mizoram tinuam tur leh tihmingtha turin Ram leilung fate'n mawh kan phur - Zira

Minister R Lalzirliana chuan, nimin khan Mizoram Mistiri Association (MMA) General Assembly vawi rukna Chanmari YMA Hall-ah a hmanpui a; Mizoram cheibáwla tinuam tur leh tihmingṭha turin ram leilung fate'n mawh an phurh thu a sawi.

R Lalzirliana chuan, Mizoram chu ram ṭha, engkim ṭhat duhna hmun tia sawi ṭhin a nih thu sawiin, "Kan ram chei tur hian Mizo mipuite hian mawhphurhna kan nei tih kan inhre tâwk lo. Ngaw dur khup leh hring cham dûr kan neih ṭhin kan ṭhiat zel a, changél, kângṭhai leh buar hmunah a chang zo tawh a, mihringte'n kan mamawh boruak ṭha leh tui hna min siamsaktu, châkkhai tinrêng kan lamna kan ngawte hi humhalh nacháng kan hre tur a ni," a ti.

Mahni kutkawiha eizawngtu mistiri-te zinga hun hman chu nuam a tih thu sawiin Minister chuan, Mizorama hmasawnna ruhrel eng emaw zat ding tawh leh ding mekah sûlhnu an nei ve em tih inngaihtuah turin mistiri-te a chah a; contractor leh mimal in sate'n hnam dang aia Mizo mistiri-te chhawr an châk theihna turin rinawmna leh taimakna nen an hnaah hmasawn tum turin a fuih bawk.

R Lalzirliana chuan, hna thawktute'n hlawh an duh ang bawkin a chhawrtute'n hna thawk ṭha an duh tih sawiin, "Kan ram aṭanga ram danga sum tam tak luang chhuak ṭhin tikiam tur leh hna hmu lote tana hna hmuhna remchang siam turin Mizo leh Mizo kan inchhawr a ṭul a, chumi tipuitling thei tur chuan a thawktu Mizo mistiri-te pawhin inenfiah an ngaihna laiah inenfiah se a duhawm hle," a ti.

MMA General Assembly hi an president R Zosiamliana’n a kaihruai a, thu pawimawh hrang hrang an rel a ni.