Ozone Day intihsiakna lawmman sem

World Ozone Day, September 16 2017 puala sorkar laipuia Ministry of Environment, Forest & Climate Change (MoEFCC)-in Aizawla sikul ṭhenkhata Eco Club member-te tâna Slogan Competition leh Painting Competition an buatsaiha tiṭhate hnenah, nimin khan Mizoram Pollution Control Board (MPCB)-in lawmman an hlan.

Nikuma World Ozone Day puala intihsiakna hi MPCB hnuaia Environmental Information System (ENVIS) Hub-te’n an buaipui a, intihsiaknaa thupui chu 'Protection of the Ozone Layer' tih a ni. Intihsiaknaah hian Aizawla sikul ṭhenkhata zirlaite'n lawmman an dawng a, chu'ng lawmmante chu nimin khan an sikulah kal chilhin zirlaite hnenah an hlan a ni.

Slogan Competition-ah hian KM Higher Secondary School-a pawl 11 zirlai Vanrambeiseia chu pakhatna a ni a, Painting Competition-ah hian Greenland Higher Secondary School-a pawl 12 zirlai Amos Rozarmawia chu pakhatna a ni. Pakhatnate hian lawmmanah Rs. 10,000 ve ve bakah, thuchei, lukhum, t-shirt leh school bag an dawng.

Lâwmman pahnihna dawng mi mi pahnih (Rs. 7,000) leh pathumna (Rs. 5,000) dawng mi pahnih an awm a; consolation prize Rs. 2,000 dawng mi pathum an awm bawk.