NEEPCO-in Press Club sakna tur pe

North Eastern Electric Power Corporation Ltd. (NEEPCO) chuan, Kolasib Press Club sakna atan district bawrhsap kaltlangin Kolasib MJA hnenah cheng nuai 10 an pe a; nimin khan Kolasib MJA president R Lalhmingthanga kutah an hlan.

Press Club sakna tur pawisa inhlannaah hian Kolasib DC chuan, sum an hmuh chu mipui leh khawtlang tana MJA-in rawng an bawlnaah an ṭangkaipui ngei a beisei thu a sawi a; NEEPCO inphalna chu fakawm a tih thu a sawi bawk.

NEEPCO deputy manager Dr PK Saikia chuan, MJA tana an luang chhuak thei chu lawmawm a tih thu a sawi a; ram hmasawnna tehfung atan kawngpui, kawlphetha, tui, zirna-in leh hmasawnna ruhrel hrang hrangte a pawimawh tih sawiin, NEEPCO-in kawlphetha pek chhuahna kawngah theihtawp an chhuah thu a sawi a ni.

Kolasib MJA president R Lal­hmingthanga chuan NEEPCO chungah an lawm tak zet tih a sawi a, an sum hmuh chu a hmanna tur dik takah an hman tur thu a sawi bawk.