Lungleiah CM Rural Housing Scheme hawng

Chief Minister’s Rural Housing Scheme chu, nimin khan Lung­lei Convention Center-ah LAD minister PC Lalthanliana’n a hawng. He scheme hi thingtlanga cheng, in nei lo leh di ina khawsate tana in thar sakna tur leh in chhe tawh thawm ṭhatna tura Mizoram sorkarin a rua­hman a ni.

PC Lalthanliana chuan, CM Rural Housing Scheme chu mi harsate chawi kânna tura hmalakna pawimawh a nih thu sawiin, "Kut hnathawktute leh miretheite lam ṭang programme hrang hrangte sorkarin chak takin a kalpui zel a ni," a ti a; ṭanpuina chu a phu ngeite'n an dawn theih nan BDO-te leh khaw­tlang hruaitu V/C-te chu duhsak bik nei lo a, dik leh felfai taka thlang turin a chah.

LAD Minister chuan, V/C-te hnenah thuneihna tam zawk leh sang zawk pe turin sorkarin rua­hmanna a siam mek nia sawiin, V/C-te chu lo inbuatsaih lâwk turin a chah a; CM Rural Housing Scheme chu mi tam tak tan malsawmna a thlen ngei a rin thu a sawi.

CM Rural Housing Scheme hawnna inkhawm hi Lunglei DC Lalzarmawii'n a kaihruai a, DRDA project director K Lalrohlua'n scheme a sawifiah. Sorkar department hotu te, tlawmngai pawl aiawh te, chanchinbumite leh Lunglei district-a V/C-te an tel a ni.

Chief Minister’s Rural Housing Scheme hi NEDP hnuaia hmalakna a ni a; he scheme kaltlang hian Mizorama district panga - Champhai, Lung­lei, Kolasib, Mamit leh Aizawl district-ahte in 2,000 sak tum a ni. In sak nan a dawngtute hnenah Rs. 50,000 ṭheuh pek a ni dawn a, ṭum thuma pek tur a ni.

Lunglei district bikah chuan CM Rural Housing Scheme ṭanpuina dawng tur chhungkaw 619 an awm a; thingtlang khuaa awmte tana insakna tur a nih avangin, town-a puan tawh Lunglei, Hnah­thial leh Tlabung khuaa chengte a huam tel lo.