Mizoramah chawlhkar hnih chhung khauh zawkin inkhàrkhip a ni dawn

Chief Minister chuan, Covid-19 hripuiin Mizoram a rùn zel avangin hmalak dan tur ngaihtuah tura inko khawm an nih thu a sawi a, "Cabinet-in ngaihtuah ngawt dawn chuan a hre ber kan ni si lo. State Task Force-te'n ni tin zan tin an chhui a, an ûm zui a ni. Tun dinhmun enin, lo haw turte kan la nei zel si a, ngaihtuah a ngai a ni," a ti.

State páwna tangkhang mi sing rual Mizorama an rawn haw hnuah buaina a zual thu sawiin Zoramthanga chuan, "Tangkhangte hi a tìrah hruai haw mai âwm, a lèn nasat hnuah hruai haw an nih avangin kan buai phah leh si, tihte a awm thei. India sorkarin a phal lo a, thlawhtheihna leh rél a tlantir lo a, motor hmanga inter-state tlante a phal lo a ni," a ti a; sorkar laipuiin a phal veleh tangkhangte hruai haw an nih thu a sawi.

Chief Minister chuan, khauh zawka inkharkhip leh chu mipui duh dan nia a hriat thu sawiin, "Economy chu kan ngaihtuah tur a ni a,  chutih rualin, economy ngaihtuah luat vanga Covid-19 tawrh nasat lutuk a hlauhawm. Kar hnih/thum khauh zawka kan inkharkhip leh hi  kan inchhîr lo tawpin ka ring. Tunah chuan kan beisei aia tamin a darh ta si a ni," a ti.

Health minister Dr R Lalthang­liana chuan, hripui chu mipui vantlanga a darh (community spread) tak tak chuan mipui an indang zo lo ang tih a hlauhawm thu sawiin, "Kan health facility a ṭhat tâwk loh vang leh kan ram awmna hmunin a zir lo a, bungraw lak luh zung zungte a har avangin community spread a thlen a hlauhawm hle a ni," a ti a, Health Minister a nihna aṭangin khauh zawka inkhàrkhip a thlàwp thu a sawi. 

•    Khauh zawka chawlhkar hnih chhung inkhàrkhip

•    Quarantine facility-a awm hun chhung ni 14 ni ṭhin chu ni 21 a ni tawh ang

•    Ṭul tàwpah loh chuan home quarantine tih tawh loh

•    Inkhàrkhip dan tur chu veng, khua leh awmna area azira inkaihhruaina siam

•    Khawpuiah chuan khauh taka inkhàrkhip

•    Inkhàrkhip kalphung tur chu Chief Secretary kaihhruaiin State Disaster Management Authority hnuaia SEC-in an duang ang.

†    AMC area, district khawpui leh contain­ment area-ah phalna nei lote páwna chhuah phal a ni lo. Hei hian a chunga tarlan tawh phalna pek sate bakah, insurance, ATM, petrol pump leh gas buaipuitu, courier, home delivery, e-commerce, private security-te a huam lo. 

†    International border leh inter-state border-te khâr chhunzawm tur.

†    June 10, Nilaini tlai dar 5 aṭangin Lengpui Airport khâr a ni dawn.

†    Bairabi, Vairengte leh Kanhmun kaltlanga mipui ni tin mamawh lak luh chhunzawm theih.

†    Home department phalna la hmasa loin Mizorama luh khap, state páwna tangkhang Mizoram sorkarin a hruai hawte erawh a huam lo.

†    Phalna neia Mizorama lut reng reng entry point-ah uluk taka enfiah an ni ang. 

†    State páwn aṭanga lut reng reng ni 21 chhung khung hran tur. Home quarantine chu ṭul zual bikah chauh phal a ni.

†    Bungraw lak luh theih - essential commodity leh Home department-in a phalsak bungraw dangte.

†    Aizawl leh district khawpuia bungraw phur lut tur leh phur chhuak turin DC aṭanga phalna lâk a ngai.

†    AMC huam chhung, district khawpui leh DC-te'n containment area-a an puanahte dawr leh sumdawnna hawn khap. Ni tin mamawh zawrhna dawr, mihring leh ran damdawi dawr, thlai chi leh leiṭha zawrhna dawr, kut hnathawktute mamawh zawrhna, ran chaw zawrhna, oil leh motor part zawrhna dawrte DC leh task force ruahman angin hawn theih.

†    Khaw dang zawngah dawr, sum­dawnna leh eizawnna a pangngaia kalpui theih. Mahse, a ṭul angin DC-te'n kaihhruaina/khuahkhirhna an siam thei.

†    Mahni ina mimal eizawnna te phalna la loa kalpui theih a ni a, social distancing zawm tur.

†    Mipuiin thlai leh chawhmeh awlsam zawka an hmuh theih nan veng hrang hrangah task force-te'n ruahmanna an siam ang.

†    Dawr zawng zawng (damdawi dawr tiam loin) tlai dar 5-ah khâr vek tur.

†    Zirna-in zawng zawng khàr chhun­zawm tur a ni.

†    Mi panga aia tam punkhawmna - inneih lawmna (reception), lungphun, champha lawmna, games & sports, lehkhabu tlangzarh, pawl thila kal khawm, intihhlimna chi huaihawt phal a ni lo. 

†    Inneih inkhawm leh mitthi vuinaah mi 35 aia tam kal khawm loh tur.

†    AMC area, district khawpui leh DC-te'n containment area-a puante 

aṭanga luh leh chhuah (zin veivah) phal a ni lo. Hei hian lockdown hmaa zin chhuak, dam lohna thil leh chhung­khatte chhiat tawh thila veivah a huam lo a, task force kaltlangin DC-ah dil hmasak tur a ni thung.

†    Aizawl leh district khawpuia sorkar hnathawk group A-te an kal vek 

ṭhin ang a, group B-te a zatvein an inkal chhâwk ang a, group C leh D-te hmun thuma ṭhena hmun khat zelin an inkal chhâwk ang. Sorkar laipui hnuaia mite chu an hmunpuia mite kaihhruaina angin an kal ang.

†    AMC area, district khawpui leh DC-te'n containment area-a puanahte lirthei tlân chhuah phal a ni lo.

†    Lirthei tlân chhuah phal loh hian - sorkar hnathawk duty, ambulance leh medical/veterinary emergency-a hman, damdawi-ina thawk, mipui ni tin mamawh phur,  bank-a thawk pisa kai tur, telecom service duty, print & electronic media, bawlhhlawh paih, bawnghnute phur/sem, task force duty, phalna neia bungraw phur lirtheite leh kohhran hminga register lirtheite a huam lo. 

†    Páwna chhuak tur reng rengin hmai tuam tur.

†    Zan dar 7:30 leh zing dar 4:30 inkarah pawna chhuah khap a ni.

†    Mi panga aia tam punkhawm khap a ni. 

†    Health department, Home department, DMR department, Civil Aviation, Excise & narcotics, municipal service, Forest field work, PHE/PWD/P&E technical staff-te chu an vaiin an kal ang a; Aizawl leh district khawpui ni lo zawnga sorkar pisate pawh an zavaiin an kal ang.

†    Sorkar hnathawk hrisel lohna nei leh nau paite an pisaa hotute'n medical certificate ngai loin commuted leave an pe thei.