Khawpuiah inkharkhip kalpui khirh zual dawn

State Disaster Ma­nagement Authority hnuaia State Executive Committee chu chief sec­retary Lalnunmawia Chuau­ngo hoin nizan khan an ṭhukhawm a, June 9-22 chhunga Mizorama total lock­down kalpui thar tur chu khawpuiah khauh zawka kenkawn an rel a,  thing­tlangah erawh chuan mipuiin ei bar zawnna hna an thawh theih dan tura duan a ni.

Aizawl Municipal Cor­poration (AMC) area, district headquarters zawng zawng leh sorkarin containment area-a a puan huam chhungah phalna nei lo chu mahni in leh compound chhuahsan phal a ni lo a, heng hmuna chengte hi zin chhuah khap a nih bakah phalna nei lo tan lirthei lak chhuah khap a ni.

Aizawl Municipal Area huam chhung leh dis­trict headquarters tinah sumdawnna dawr inhawn phal a ni lo a; amaherawhchu ni tin mamawh (essential commo­dities) zawrhna dawr, mihring leh ran dam­dawi zawrhna, kuthna­thawktute mamawh zawrh­na, ran chaw zawrhna leh bungraw phur mamawh oil leh spare part zawrhna dawrte chu DC leh task force-te ruahmanna angin hawn theih a ni ang a, district headquarters ni lo khaw dang zawng chu dawr hawn phalsak an ni ang.

Mipuite'n awlsam zawka chawhmeh an lei theihna turin task force-te'n ruahmanna an siam thei ang a; mimal eizawnna hna hrang hrang - puanṭhui, puantah, chhangsiam (bakery), thir lam hna (fabrication), thing lam hna (carpentry)-te chu kalpui theih a ni ang a, a hranpaa phalna dil a ngai lo ang.

Aizawl leh district hqrs-a group A officer-te chu dan pangngaiin office kal tur a ni a, group B chu 50% an in kal chhawk ang a, group C & D-te chu hmun thuma ṭhena hmun khat an inkal chhawk ang.

Zirna in leh sakhaw biakna hmunte chu khar chhunzawm zel tur a ni a; infiamna hmunhmate khar tura tih a ni. Mitthi vuinaah mi 35 aia tam punkhawm phal a ni lo a, kohhran leh khawtlang hruaitute chu hei hi khauh taka kalpui tura beisei an ni.

Inkharkhipin a huam loh zingah hminghmerha duty tura ruat, sorkar hna­thawk pisa kal leh haw tur, damdawi lama thawktu, media lama hnathawktute leh chanchinbu sem, bawng­-hnute sem, bawlh­hlawh paih, bank hnathawktu, postal leh telecom-a hnathawktute an tel.

Zoram Medical College (ZMC) leh district khawpui hrang hrangah Covid-19 enkawlna tur siam a nih thu sawiin Health Minister chuan, "Chutih rualin, community spread a thleng a nih chuan min dâwl zo lo ang tih a hlauh­awm a ni," a ti.

Meeting-ah hian pawl hrang hrang aiawhte chuan, mipuite an inthlahdah ta lutuka an hriat thu te, khauh zawka inkhuah­khirh ṭha an tih thu te, home qua­rantine chu khauh taka kalpui a harsat thu te, quarantine hun chhung chu ni 21 tal ni se 

ṭha an tih thute leh, quarantine centre-a awm lai ngeia RT-PCR hmanga swab test result hriat hman theih ni se an duh thute an sawi hlawm.

Indian medical Association (IMA), Mizoram Branch aiawha thusawitu chuan, Covid-19 chu ṭhalaiah thawk na vak loa hriat ni mah se, Mizo zingah HIV/AIDS kai, zunthlum leh thaw-hah (asthma) neite an tam avangin Covid-19 chuan Mizo ṭhalaite a sawp hrep theia an hriat thu a sawi.

Doctor-te chuan, ni 14 khauh zawka inkhàrkhip a nih chuan Covid-19 vei an awm pawhin symptom a lang chhuak hman ang a, RT-PCR hmanga quarantine-a an awm chhunga endik zel theih a nih chuan mipui vantlanga darh tur eng emaw chen a vèn theih an beisei a ni.