Hri len lohnaah an inkhawm ṭan dawn ta

Sorkarin inkaihhruaina a hman mek angin, bawrhsapte chuan Covid-19 vei awm lohna khaw ṭhenkhatah biak-ina kohhran inkhawm an phalsak tawh.

Serchhip district bawrhsap mawhphurhna la mektu Lalmuansanga Ralte chuan nimin khan Serchhip district-a Covid-19 vei mek awm lohna khaw 18-ah dilna lut angin biak-ina inkhawm phal a nih thu a puang. Champhai district-ah chuan hripui vei awm lohna khua zawng zawngah inkhawm phalna pek a ni tawh a; Khawzawl district-ah chuan khaw pariatah inkhawm phalna pek tawh a ni.

Vanglaini palai zawhna chhangin Champhai DC Maria CT Zuali chuan, Champhai khawpui huam chhung leh Zokhawthar tih loh khaw dangah chuan Covid-19 vei mek an awm meuh lo tih a sawi a, "Covid-19 positive mek awm lohna khuaah inkhawm phal a ni tawh a, village task force leh kohhran hruaitute'n ruahmanna an siam ang," a ti.

Champhai DC sawi danin, an district chhunga Covid-19 vei mek awm lohna khuate chu inkhawm phalna pek vek an ni tawh a, an inkhawm a nih chuan hripui laka invènna atana nun dan tur kaihhruaina zawm vek tura tih an ni. Inkhawm dan tur chu VTF leh kohhran hruaitute'n an ruahman dawn a ni.

Serchhip additional DC Lalmuansanga Ralte pawhin nimin khan an district-a khaw 18-ah inkhawm phal a nih thu a puang. Inkhawm phalnaahte hian Pathianni chhûnah chauh inkhawm phal a ni a, biak-ina leng zat chanve (50%) emaw, mi 200 aia tam lo emaw vawi khatah inkhawm phal niin, inkhawmnaah zai phal a ni lo.

Inkhawm phalna khuaa kohhrante chu village task force nen thawkhoin SOP Imple­mentation Committee din tura beisei an ni. Covid-19 symptom neite chu inkhawm phal a ni lo a, natna benvawn nei leh kum upa, hriselna chak tawh lote chu a theih chin chinah tel lo tura thuràwn pek an ni.

Serchhip district-a inkhawm phalna khuate chu - Bâwktlang, Lungchhuan, Sailu­lâk, Pilêr, Théntlang, Chekâwn, Thinglian, Vanchéngtê, Sialhau, Sialsír, Rúllàm, Keiṭum, Hualtu, North Vanlaiphai, Lungpho, Khawbél, Bungtlang leh Hmunṭha te a ni.

Khawzawl district-ah chuan khaw pariat - Biate, Khawhai, Lungtan, Chhawrtui, Vanchéngpui, Chalráng leh Kawlkulh khua­ahte inkhawm phal a ni tawh.

Vanglaini thu dawn danin, Covid-19 vei awm lohna khuaah chuan VTF-te'n inkhawm theih nia an hriat chuan DC-ah an dil a, nimin thleng khan khaw pariatte chu inkhawm phalsak an ni tawh a ni.