GAC-ah MA zirna hawn a ni

Govt. Aizawl College (GAC)-ah post graduate course, Master of Arts zirna hawn ṭan a ni a, a bul ṭan nan kum 2021-22 session atan Education subject hawn niin, nimin khan zirna an ṭan.

Thu dawn danin, Mizoram sorkar leh Mizoram University ruahmannain GAC-ah hian post graduate zirna hawn a ni a; MZU-ah MA zir chhunzawm duh, seat chang si lo tam tak an awm ṭhin avangin zirlaite harsatna phuhrûkna atana ruahman a ni.

GAC-a Education subject-a MA zirna hawn takah hian a bul ṭan nan zirlai 20 lak phawt tum a ni a; zirtirtu, associate professor pasarih awm mekin, chu'ngte chuan BA leh MA zirlaite an zirtir ṭhin dawn a ni.

GAC-ah hian Arts leh Commerce zir theih a ni a, zirlai 1,967 an awm mek. Campus pahnih - Sikulpuikawn leh Mualpuiah an nei a; PG class hi Sikulpuikawnah neih a ni ang.