MPYCC-te'n electric bill an hal

Mizoram Pradesh Youth Congress Commi­ttee (MPYCC) chuan nimin khan Covid-19 vanga mipuiin harsatna an tawh mek laia electric bill sáng uchuak taka siam chu mipui rawkna dik takah ngaiin, sorkar laka lungawi lohna an lantir a, Vanapa Hall kawtah electric bill eng emaw zat an hâl.

Electric bill hâl puala inkhawm tawi buatsaihah MPYCC president Dr Lalmalsawma Nghaka chuan, sorkarin dâwt bill, bill phuahchawp mipui a hlui niin a sawi a, "Covid-19 avanga in­hawng thei lo dawr te, sikulte leh hmun dangte pawhin bill sang tak tak an dawng. Hripui avanga kan fairèl bél a ruah mek laiin mahni chanvo humhim duha bill complaint-tute chu zu zuar, drugs addict leh ar rûk chíng angtea puh an ni," a ti.

Dr Lalmalsawma chuan, Power & Electricity minister R Lalzirliana thusawi aṭangin mipuite chu Mizoram sorkarin eng atan mah a ngai lo tih a lan thu sawiin, "Min hmusit hle tih a hriat. Phuahchawp leh risk bill ni lo min pe rawh se. Covid-19 avanga kan harsat lai chuan power man tihsan hi sût zawk turin sorkar kan phut a ni," a ti a; sorkar thatchhia, duhâm si Mizoramin a hrawn mek niin a sawi.

Mipui thlavâng hauha hma la an nih thu sawiin MPYCC President chuan, "An MLA leh party mite pawhin electric bill hi tam an ti. Mipui dikna chanvo humhim turin hma kan la zel dawn a, kan thlir zui reng dawn. A department chan enkawl zo lo, chapo tak si Power Minister hi báng ngam rawh se. Báng turin kan phût a ni," a ti.

MPYCC President chuan, petrol leh diesel man pawh prime minister Narendra Modi kaihhruai­na hnuaiah June 2020 aṭangin tihpun a nih thu sawiin, "Mizorama kan Modi-a pawhin a tisang ve leh nghal a, an pú-tuin min rawk a ni," a ti a; Covid-19 denchhena petrol leh diesel man chu tihniam thuai tura central leh state sorkar an phût thu a sawi.

Congress ṭhalaite hian electric bill dik lo taka siam duh loh lantirna banner chi hrang hrang an tár a, Aizawl khawpui hmun ṭhenkhatah puan dum an zár bawk.