Vairengte dáia inkahna avangin NHRC-in insawifiah turin sorkar a ti

National Human Rights Comission (NHRC) chuan July 26, 2021-a Assam police-te'n Vairengte dáia Mizo IR police-te awmna hmun an chhuhsak avanga inkahna thlengah mihring dikna chanvo palzûtna a awmah a ngai a, central, Mizoram leh Assam sorkar chu insawifiah turin a hriattir.

Assam mi pakhat chuan Vairengte dáia inkah­naah mihring dikna palzûtna a awm nia ngaiin NHRC hnenah a zualko a; chumi bawhzui chuan NHRC chuan August 22, 2021 khan Union Home Secretary bakah, Mizoram leh Assam chief secretary-te hnenah lehkha thawnin, chawlhkar li chhunga insawifiahna thehlut turin a hriattir a ni.

NHRC chuan, Mizo­ram leh Assam police-te inkahna avangin sorkar hnathawk thi leh hliam an awm chu an ngai thutak hle tih a tarlang a, "He thilah hian mihring dikna chanvo rahbehna a awm a, hetiang thil thleng hi kan ngai thutak (serious) hle a ni," a ti.

Tarlan tawh angin, July 26, 2021 khan Assam police mi 200 vel chuan Vairengte dáia Mizo IR-te chu an awmna hmun an hnehchhuh a, chumi hnuah silai an hmet puak a ni. Mizoram police-te pawhin an kâp lêt a, Assam police paruk an thi a, Mizoram police zingah thi an awm lo thung.

Inkahna thlen hnuah Mizoram IR police-te chuan an awmna hmun chu an luah zui leh nghal a, nimin thleng kha chuan Assam lamin harsatna an la siam zui lo a ni.