Mizoramah sikul 369 hawn a ni tawh

School Education officer-te leh Central YMA Kumpuan Committee member-te chu nimin khan School Education directorate conference hall-ah an inkawm a; zirna siamṭhat chungchang an sawiho. Nimin thlenga dinhmun angin, Mizoramah sikul 369 hawn a ni tawh tih an tarlang.

Inkawmhona hi School Education director James Lalrinchhana'n a kaihruai a; zirna siamṭhat kawngah a theih ang anga ṭan lakho ṭha an ti a, sawihona aṭanga ngaihtuah zui ngaite chu committee sang zawkah thlen ni se, an ti.

School Education department Media Cell-in YouTube-a tutorial video clip an dah chu a link CYMA-ah pek ni se, an ti a; chu chu CYMA-in a remchan angin zirlaite tan hmun hrang hrangah an sem darh dawn a ni. Mizorama zirnain hma a sawn theih nan essay inziahsiak buatsaih an rêl bawk.

Covid-19 avanga zirna a khaihlak dan tarlan a ni a; Aizawl páwn lam, Covid-19 vei awm lohna khuaah zirna-in hawn a nih tawh thu te, nimin thlenga School Education directorate-in a chhinchhiah chinah sikul 369 hawn a nih tawh thute tarlan a ni.

Inkawmhonaah hian School Education department aṭangin Director bakah, joint director Lalhmachhuana leh officer dangte an tel a; CYMA Kumpuan Committee aṭangin chairman Lalhmachhuana hoin member-te an tel.