Tuipui-D lei dawh thar tum enfiah

Minister Dr R Lalthangliana chuan nimin khan a bial South Tuipui chhunga Border Road Organization (BRO)-in Tuipui-D (Darzokai) lei dawh thar tur an ruahman mek a tlawh.

Tuipui-D lei hi BRO, Ministry of Defense bultumin lirthei eng chi pawh zawh theiha dawh tum a ni a, DPR pawh sor­kar laipuiah thehluh a ni tawh. Ruahman dan chuan, lei chu cheng vbc. 80 vel sêngin kum hnih chhunga dawh zawh tum a ni.

Dr R Lalthangliana chuan, Tuipui-D lei hman mek chu chhim lam khaw tam takte mamawh châwk luhna kawng pawimawh ber pakhat a ni tih sawiin, "Lei changtlung zawk dawh tura ruahmanna awm mek hi a puitlin ngei theih nan leh chak zawka hmalak a nih theih nan Ministry of Defense lamah bawhzui turin kar lehah Delhi zin ka tum," a ti.

Health Minister hian Tuipui-D, Hnahthial Electric Veng leh Hnah­thial Kanaan Venga CCCC-te hnenah leh Hnahthial District Hospital-a hman turin Rs. 10,000 ṭheuh a pe a; Pangzawl damdawi-in (PHC) sak mek a tlawh bakah, Serchhip DC conference hall-ah Serchhip district hotute nen Covid-19 chungchanga hmalaknate an thlirho bawk.