Robert Romawia'n Tourism Minister a kâwm

New Delhi-a chám mek Tourism minister Robert Romawia Royte chuan August 23, Thawhṭanni zan khan Union Minister of State for Tourism minister Ajay Bhatt chu a chenna inah a kâwm a, Mizoram Tourism department hmalakna leh hmachhawpte a sawipui.

Robert Romawia Royte hian Tourism Ministry-a project an thehluh tawhte chu pawm tur leh sum pe chhuak thuai turin Ajay Bhatt a ngen a; Ajay Bhatt chuan, tihfel thuai a tum tur thu a hrilh bakah, Mizorama zin vat a tum thu a sawi.

Union Minister of State for Defence ni bawk Ajay Bhatt hnenah hian Robert Romawia chuan, Myanmar leh India inkarah inkungkaihna ṭha zawk a awm zel theih nan Myanmar ramah football khelmual phùl lem phah, indoor stadium, sikul, community hall leh futsal ground-te India sorkar suma siam ṭha a tih thu a sawi. Defence Minister chuan, Mizoram Chief Minister-in Prime Minister hnenah ziakin thehlut se, tiin thuràwn a lo pe a, bawhzuipui a inhuam thu a sawi tih sorkar thuchhuahin a tarlang.

Robert Romawia Royte hian nimin khan NITI Ayog adviser Dr Prem Singh chu tourism leh sports tihhmasawn nana EAP Project sanction tur buatsaih lai mekte a sawipui a, NITI Ayog Adviser chuan an chanpual chu ni rei lo tê chhunga an tihfel tur thu a lo hrilh bakah, Finance Ministry-ah recommendation an thawn nghal dawn a ni.

Minister Robert Romawia hian Ministry of Minority Affairs leh Ministry of Finance-a officer liante a kawm bakah, IT Minister a kâwm bawk.