MNF ṭhalaiin Congress ṭhalai an dem

Mizo National Youth Front (MNYF) chuan thuchhuah siamin, Congress party ṭhalaite'n nimina Vanapa Hall kawta lungawi lohna an lantir chu àwm lo an tih thu leh an dem thu an tarlang.

MNF ṭhalaite chuan, Power & Electricity department-in electric bill chungchang an sawifiah tawh tih tarlangin, "Tun ṭuma electric bill thar ber hi hri léng avangin meter reading tih thlap thlap theih a ni lo a, hei vang hian bill hmasa pahnihte chawhrual anga bill siam a ni. Heti chung hian sorkarin mipui harsatna hrethiamin complaint hun a hawng a, hun tiam a tàwp hnuah pawh a hawn belh zel zawk a ni," an ti.

MNYF chuan, Congress ṭhalaite chu Power & Electricity minister R Lalzirliana thusawi an duh lai lai la chhuaka mipui rilru hruai sual theihna tura báwl phuanah puhin, "Kan Power Minister khan mi fel tam tak zinga mi sual tlemtein thil an tihpunlun theihzia a sawina a ni," an ti a; Congress ṭhalaite thil tih dan chu a him lo hlea an ngaih thu sawiin, chíng tawh lo turin an chah a ni.