KHAWTHLIR

Thisen pe
Nimin khan KṬP, Serchhip Bazar Branch chuan Serchhip District Hospital Blood Bank-ah thisen unit 20 an pe a, petute mipa 12 leh hmeichhia pariat an ni. Baptist Higher Secondary School NSS pawhin nimin khan Christian Hospital Blood Bank-ah thisen unit 13 an pe bawk.

MHIP-in dem
MHIP General Headquarters chuan nimin khan thuchhuah siamin, Lallianmawia s/o Lalpiangliana, Kolasib-in a nupui Chatuan Lalramngaii d/o Chuauhlunchhunga, Kolasib Electric Veng na taka kut a thlâk leh hâl hlum a tum chu pawi an tih thu an tarlang a, "Damdawi-ina admit ngai khawpa kutthlaktu Lallianmawia hi dan anga a phû tâwk hremna a hmuh ngei theih nan hma la turin thuneitute kan phûtin kan ngen a ni," an ti.

Pisa thar hawng
Transport minister TJ Lalnuntluanga chuan nimin khan Lawngtlai Distirct Transport Officer pisa thar a hawng. Pisa thar hi cheng nuai 228 sénga sak a ni. TJ Lalnuntluanga chuan, Transport department-a thawkte chu an thawk rim tak zet tih a sawi a; Lawngtlai district mipuite chu Transport department nen thawhhona ṭha tak an neih vawng nung zel turin a chah. Lawngtlai DTO pisa hi NEDP sum cheng nuai 228 séngin June 20, 2016-ah sak ṭan a ni a, January 31, 2020 khan sak zawh a ni.

Chhiatna zirho
Nimin khan Serchhip DC meeting hall-ah Serchhipa sorkar pisa hrang hranga hotu (head of office) mi 59-te pualin chhiatna a thlena hmalak dan tur zirna (disaster management training) buatsaih a ni a; bawrhsap mawhphurhna la mektu Lalmuansanga Ralte-in a hmanpui a, "Engtik lai pawha chhiatna tâwk thei kan nih avangin inbuatsaihna ṭha tak neia awm reng hi kan tihmâkmawh a ni," a ti. Training-ah hian district organiser Vanlalduhi Ralte, DFO Margareth Lalramchhani leh DVO Dr Lalmakthanga ten thil pawimawhte an zirtir a ni.