Pangbalkawna rice mill hawn dan tur sawiho

Agriculture minister C Lalrinsanga kaihhruaiin nimin khan a pisaah Pangbalkawn, Kolasib district-a Mizorama rice mill hmasa ber tur bun mek hawn dan tur sawiho a ni.

C Lalrinsanga chuan, Mizoram sorkarin Pangbalkawna rice mill a buatsaih mek chu hawn theih mai tawh tur a nih thu sawiin, "Buh thar tihpun a nih theih nan Agriculture leh Irrigation & Water Resources department ṭangkawpin kum khata buh vawi hnih thar thei tura ruahmanna an kalpui mek a ni," a ti a; Modern Rice Mill din tura sorkar hmasa lama hmalakna bul ṭan tawh chu changtlung zawka a hmáwr bâwk ngei a nih theih nan theihtawp chhuah mek a nih thu a sawi.

Ṭhutkhawmah hian, rice mill-a her turin loneitute buh thar lei dan tur leh a hralh dan tur kalhmangte sawiho a ni a, Mizoram sorkarin buh chingtute leh leilet neitute'n hlâwk zawk leh awmze zawka rice mill hmanga an buh tharte an tihral theihna turin collective farming system duan mek a nih thu tarlan a ni. Kalphung tharah chuan buh chíngtute chu Farmers Producer Organisation (FPO) anga enkawl tur a ni a, an buh tharte chu rice mill-ah lak khawm a, mumal taka tihral tum a ni.

Tarlan danin, rice mill hian darkar khatah buhhûm metric ton 5 a her thei a, a hmunhma leh building-te erawh chu darkar khata metric ton 10 her thei dâwl zo tura ruahman a ni. Kum khat chhungin buhfai quintal 2,00,000 chuang her chhuak thei tura beisei a ni bawk.