Ramri dep khuate'n ṭan rualna an fak : Mizote delh chin ram chàn an duh lo

Ramri depa awm khua - Vairengte Joint Village Council, Vairengte All NGO, Phainuam Village Council leh Saipum Village Council hruaitute chuan nimin khan Aizawl Press Club-ah thuthar thehdarhtute an kâwm a, ramria sorkar hmalakna an fak rualin eptu party lamte'n sorkar an thlawpna lawmawm an ti a; hetihlai hian "Kan delh chin ram inchi khat pawh chàn kan duh lo," an ti.

Vairengte Joint VC chairman R Lalfamkima chuan, Mizoram leh Assam ramri buai avanga harsatna thlengah, ram leh hnam chhanna tura sorkar hmalakna hrang hrangah ramri dep khuate an lawm thu sawiin, "Chief Minister, Home Minister, Power Minister, Education Minister, Serlui Bialtu MLA leh official-te chungah lawmthu kan sawi tak meuh a ni," a ti a; eptu party-te pawhin ramri buai chu party hamṭhatna atana la loin, sorkar an thlàwp tlat niin a sawi.

R Lalfamkima chuan, Mizoram police-te fakin, "July 26, 2021 chawhnu lama Assam police-in Mizoram police duty post an rawn luahlan la lêt tura inkahna thlengah Mizoram police-te huaisenna fakawm kan tiin kan chhuang tak zet," a ti.

Mizoram khaw hrang hrang aṭangin ramri khuate thlàwpna an dawng a, mimal, páwl leh kohhran hrang hrang aṭangin sum an dawn bakah, ṭawngṭainate an dawn nasat thu sawiin R Lalfamkima chuan, "Ramri buaina avanga Mizo hnamin harh tharna kan chang leh ram leh hnam hmangaihna ṭhangtharte nuna tuh thara a awm hi lawmawm kan ti hle," a ti a; hun lo kal zel turah inhmangaiha inpui tawn zel turin Mizoram mipui a sáwm.

Zawhna chhángin ramri dep khawtlang hruaitute chuan, Aitlang leh Buarchep hmunah Mizoramin ram a chán tia sawina atan chuan a la hma deuha an hriat thu an sawi a, "Inbiakna pawh a la awm lo a, an luah hawh rihah kan ngai. Heng ramte hi chàn kan duh lo. Aitlang lamah hian Mizoramin kawng kan laih avang leh police-te an duty zel avangin hnam dang 70 velin an huan an chán ve thung," an ti.

Ramri dep khawtlang hruaitute chuan, ramriah Bengal Eastern Frontier Regulation, 1875 chu an pawm thu an sawi rualin, "Indian union hnuaiah kan awm a, pawisa khat hmang kan ni. BEFR 1875 huam chhungah hian an chêng tawh a, zuk tihbuai ṭha kan ti lo. Kan delh chin erawh inchi khat pawh chàn kan duh lo," an ti a; BEFR 1875 neih lêt dawn chuan hnam dang nuai 4-5 vel neih tel a ngaih tur thu an sawi.

1875 ramri huam chhunga chéng hnam dang sumdawng hausate'n Mizorama beh an duh nia sawiin ramri dep khawtlang hruaitute chuan, "ILP ngai loa Mizoramah ramte neih a, zalen taka sumdawn an duh. Heng ho hi kan rama awm kan duh ang em?" an ti a; political party-te'n politics dahṭha a, ram leh hnam hmangaihna nen Mizoram chin atana pawm nei chunga inbiakna neih ṭha bera an hriat thu an sawi.

Ramri dep khawtlang hruaitute sawi danin, Assam ṭan chhan - kum 1933-a ramri siam ang chuan Vairengte khuaa in 200 chuang chu Assam-ah a beh a ngai dawn a, Phaisen leh Buarchep pawh Assam huam chhunga awm a ni.

Chutih laiin, BERF 1875 ramri ang chuan, Mizoram chin chu Dholai lei thleng chauh a ni lo a, Cachar district-a Narsingpur khua thleng niin, chumi huam chhungah chuan hnam dang nuai 4-5 vel an chêng a ni.