Mizoramah Covid-19 vei mek mi 41 an awm

June 7, Pathiannia Zoram Medical College (ZMC) Covid-19 Labo­ratory-a mi 244-te swab sample endikah mi pariatin Covid-19 hripui an vei tih hmuh chhuah a ni. He chan­chin ziah lai hian Mizo­ram­ah Covid-19 hripui vei mek mi 41 an awm mek a ni. 

State Referral Hospital (SRH)-ZMC Covid-19 Bulletin tarlan danin, Pathianni zana hripui vei hmuh chhuah thar mi pariatte chu Champhai district mi panga, Khaw­0zawl district mi pahnih leh Siaha district mi pakhat an ni a; hmeichhia panga leh mipa pathum niin, Delhi aṭanga rawn haw vek, kum 21-30 inkar an ni. 

Hripui vei hmuh tharte taksah hian Covid-19 hri vei an ni tih hriatna (symptom) a lang lo. An vaiin an district ṭheuha Covid-19 Care Centre-ah enkawl an ni. 

Covid-19 vei mekte awmna district-te chu Aizawl district-ah mi 9, Lunglei 2, Siaha 1, Champhai 5, Kolasib 11, Mamit 8, Lawngtlai 2, Saitual 1 leh Khawzawl 2 a ni a; Serchhip leh Hnahthial district-ah vei an la awm lo.

SRH-ZMC ah Covid-19 vei mi 22 enkawl mek an ni a, pakhat chu ICU-ah enkawl mek ni mah se, ngaihtuahawm a ni lo. 

ZMC Laboratory-ah hian nimin khan mi 200 chuangte swab sample endik leh a ni a, zan lamah result hriat theih beisei a ni. 

SRH-ah hian mi 40 an awm mek a; Covid-19 vei mi 22-te chu ICU-ah mi pakhat leh Isolation Ward-ah mi 21 enkawl an ni a, Risk Ward-ah mi 12, Make Shift ICU/SARI Ward-ah mi pahnih, NICU-ah mi pakhat leh Holding Ward-ah mi pathum an awm a ni.

Pathianni tlai dar 5 leh nimin tlai dar 5 inkar khan Mizoram luhka hrang hranga screening point-ah mi 893 enfiah an ni a, rapid antibody test (RAT) hmangin mi 170 endik an ni. Quarantine facility-a dah thar mi 113 leh home quarantine-a dah thar mi 43 an awm bawk.