KHAWTHLIR

Central YMA office bearer te, CYMA Kumpuan Sub-Committee office bearer-te leh Mizoram Teachers’ Federation (MTF) hruaitute chu nimin khan CYMA Committee Room-ah an inkâwm a, YMA kumpuan 'Zirna uar' chungchang an sawiho. Mizorama zirnain hma a sawn dan tur te, sorkar sikul thuam ṭhat a ṭul thu te, Mizo ṭawng dik zawka hmang tura inzirtir a ngaih thu te, zirlaibu bakah lehkhabu chhiar tam tura infuih a pawimawh thu te, central/all India service-a lut tam tura zirlaite fuih a 

ṭul thute an sawiho a ni.

Falkawn khawtlang chuan June 7, Pathianni zan khan Covid-19 lakah an khua leh Mizoram a him theih nan ṭawng-ṭai rual an huaihawt. Falkawn khua hi dedicated Covid-19 hospital - State Referral Hospital (ZMC) awmna a ni a, tun hnaiah Covid-19 vei hmuh chhuah thar zinga a tam zawk ZMC-ah dah an nih avang leh, ZMC-a thawktu zingah Falkawn mi leh sa an awm nual avangin hripui laka an khawtlang a him theih nan leh Mizoram a him theih nan mahni in ṭheuha ṭawngṭai rual hi an huaihawt a ni.

BJP Mizoram Pradesh chuan thuchhuah siamin, India ram leh Mizoramah Covid-19 kai an pung zel a, mi tin an fimkhur a ṭul zual laia School Education Minister-in zirna-inte July 15, 2020-a hawng tura a ti chu a rang thei ang bera sût turin an ngen tih an tarlang a, "Central ruahmanna zûlzuia kal turin Mizoram sorkar kan ngen a ni," an ti. Mizoram BJP chuan sorkar laipui chuan zirna-inte chu August 2020 chhunga hawn turin thuchhuah a siam tih an tarlang.

Champhai Kahrawt leh Veng­sang mi, Aizawla khawsa mekte chuan pawisa an thawhkhawm Rs. 1,20,000 aṭangin Kahrawt Task Force hnenah Rs. 40,000, Vengsang Task Force hnenah Rs. 40,000, Champhai Sub Hqrs. YMA hnenah Rs. 20000 pawisa faiin an hlan a, a la bangin eichawp leh ni tin mamawh lei khawmin ramhnuaia duty-na hmun hrang hrangah an sem.

Aizawl DC hlui C Ropianga chuan a lehkhabu ziah 'Khat liam' tih bu 80 chu Aizawla quarantine centre hrang hranga khung hran mekte chhiar atan a thawh a, a thlàwnin Aizawl DC hnenah a hlan. Aizawl DC Vanlalngaihsaka chuan nimin khan quarantine centre hrang hrangah a sem a ni.

Kolasib DC Dr H Lalthang­liana chuan nimin khan Kolasib district Border Safety Monitoring Team hnuaia ramri venga duty tur Kolasib Gosen Veng Branch YMA member-te DC pisa kawt aṭangin a vailiam. Kolasib Gosen Veng YMA member-te hi Phaisen khuaa ramri depah an duty dawn a, June 11, 2020 zing dar 6 thleng an duty ang.